Сталкингке қарсы күрес барған сайын күшейіп келеді, деп хабарлайды @Pavlodarnews.kz тілшісі.

Жастар бастамаларын дамыту орталығында «Сталкингті тоқтат» форумы өтті. Форумды жергілікті полиция инспекторы Арман Қаптаев ашты. Ол өткен жылдың қыркүйегінде сталкинг Қылмыстық кодекске енгізілгеннен бері осындай алты оқиға тіркелгенін атап өтті.

- Бұл зұлымдық мемлекеттің, қоғамның және барлық азаматтардың ерекше назарын аударуды талап етеді. Сталкинг – бұл адамның соңына түсу немесе қорқыту ғана емес, бұл қазақстандықтардың қауіпсіздік пен тыныштыққа деген конституциялық құқықтарын бұзу, - деп түсіндірді полиция қызметкері.

Облыстық полиция департаментінің тұрмыстық зорлық-зомбылыққа қарсы  күрес бөлімінің бастығы Ботагөз Төлеуова тақырыпты егжей-тегжейлі түсіндірді. Оның айтуынша, сталкинг көбінесе отбасылық жанжалдардан немесе жақын қарым-қатынастардың аяқталуынан туындайды. 2025 жылы тұрмыстық зорлық-зомбылықтың 133 дерегі тіркелді, соның әрбір бесіншісінде сталкинг белгілері байқалды.

- Мысалы, Павлодар тұрғыны бұрынғы күйеуі тарапынан бес жыл бойы қудаланғаннан кейін полицияға хабарласқан. Ол оны әлеуметтік желілерде жүйелі түрде қорлап, қорқытқан. Қылмыстық іс қозғалды. Бұл адам қазір ұсталып, уақытша ұстау изоляторына қамалды, - деді Ботагөз Төлеуова.

Бұл тақырып мектеп оқушыларының, колледж және университет студенттерінің қызығушылығын тудырды. Павлодардың жас тұрғындары адамдар арасындағы қарым-қатынастың құқықтық аспектілеріне қатысты сауалдар жолдады. Беделді сарапшылар жас ұрпақтың сұрақтарына толықтай жауап берді.