30 тамызда облыста өткізілетін іс-шаралардың тізімі белгілі болды, деп хабарлайды @Pavlodarnews.kz.

Бұл туралы Өңірлік коммуникациялар қызметінде өткен брифингте облыстық мәдениет, тілдерді дамыту және архив ісі басқармасы басшысының м.а. Саяуыш Сәдуақасов мәлім етті.

– Конституция күніне орай облыстың мәдениет мекемелерімен 400-ден астам іс-шара ұйымдастырылады. Түрлі көрмелер, танымдық сағаттар, кездесулер, радиохабар және тағы басқа шаралар өткізіледі, – деді Саяуыш Сәдуақасов.

30 тамызда облыс орталығында мерекелік концерт өтеді. Кешкі сағат 19:00-ден 20:00-ге дейін «Ertis Promenade» сахнасында камералық хор, Жібек Айтбаева, Наталья Процкая, Алмас Мұқатай, Анель Канатова, Серік Рысбек, «Самиян» және «Табриз» тобы мен «Нұр» би ансамблі өнер көрсетеді. Ал сағат 20:00-ден 22:00-ге дейін арнайы шақырылған эстрада жұлдыздарының қатысуымен концерт өтеді деп жоспарлануда. 

– Арнайы мерекелік іс-шарамыздың қонақтары домбыраның шанағынан күй төгетін Темірлан мен Ернат, танымал әртістер Тұрар және Маржан Арапбаева сахна төрінде ән шырқайды, – деді Саяуыш Сәдуақасов.

Оның сөзінше, өңірде Конституция күні 25 тамыздан бастап тойлануда. Тұрғындар облыстық мұражайларда тақырыптық көрмелерді тегін тамашалай алады. 

29 тамызда

Павел Васильевтің музей-үйінде сағат 10.00-де «Ата Заң – тәуелсіз ел тұғыры» көрме диалогы;

С.Торайғыров атындағы облыстық әмбебап ғылыми кітапханасында сағат 11.00-де «Конституция – тәуелсіз ел тұғыры» атты кітап көрмесі;

Г.Н.Потанин атындағы облыстық тарихи-өлкетану музейінде сағат 11:00-де  «Бірлік туы» атты интерактивті дәріс сынды іс-шаралар өтеді. 

30 тамызда 

Сағат 12:00-де Орталық мәдениет және демалыс саябағында «Ата Заңым – айбыным!»  атты концерттік бағдарлама.

Н.Нұрмұхаммедов атындағы облыстық көркемсурет музейінде сағат 10:00-18:00 аралығында Арман Байсадықовтың «Астана. Арман Байсадықов» және Александр Пархоменконың «Материалдық емес мәдени мұрасы» атты фотокөрмесі ұйымдастырылады.

Екібастұзда кешкі сағат 18:30-да «Өнер» қалалық мәдениет сарайында «Айбары асқақ  Ата заң!» атты мерекелік концерт өтеді. Ал Ақсуда сағат 18:00-де мәдениет және демалыс саябағында «Ақсу толқыны» атты мерекелік концерт ұйымдастырылады.