Облыс әкімі Асайын Байханов жаңа жыл қарсаңында Павлодар қаласындағы №29 мектебінің командасымен кездесті, деп хабарлайды @Pavlodarnews.kz тілшісі.

– Мен жерлестерімнің жетістіктері мен жеңістеріне әрдайым қуанамын және әсіресе, балаларымыз жоғары нәтижелер көрсеткен кезде мақтанамын, – деп жазды Асайын Байханов Іnstagram парақшасында.

Өтіп бара жатқан жылдың қоржыны тағы бір лайықты жеңіспен толықты. Жақында еліміздің 175 талантты да тәжірибелі шахматшылары қатысқан «Chess Class» I республикалық олимпиадасында жеңіске жеткен жас павлодарлық шахматшылар өз жетістіктерімен қуантты.

Аймақ басшысы мұндай оқиғаны назардан тыс қалдыра алмады. Балаларды құттықтап, оларға жаңа жеңістер, оқу мен спортта жоғары табыстар тіледі.

Айта кетерлігі, бір кездері Павлодар облысы алғашқылардың бірі болып «Мектептегі шахмат» жобасын жүзеге асырған болатын. Бүгінгі таңда облыстың оқу орындарында зияткерлік ойынның негіздерін үйрететін 245 шахмат кабинеті жұмыс істейді, сондай-ақ, 12,5 мыңнан астам бала өз таланттарын одан әрі дамытуда.