Жануардың суға түсіп кеткені туралы куәгерлер хабарлаған, деп хабарлайды @Pavlodarnews.kz. 

Жедел құтқару жасағы басшысының орынбасары Серік  Шерияздановтың айтуынша, хабарлама Усолка шағын ауданындағы № 7 құтқару бөлімшесіне сағат 13:35-те түскен. 

– Оқиға орнында төрт құтқарушы жұмыс істеді. Олардың бірі су өткізбейтін костюм киіп, мұздың үстіне шықты. Екіншісі арқанмен ұстап тұрды. Жануар өзеннің  арғы  жағасына өтпек болып, құлап кеткен болу керек, – дейді Серік Шериязданов. 

Құтқарушылар жануарды көрпеге орап, № 7 құтқару бөлімшесіне жеткізгеннен кейін сағат 15:00-де «Сердца Павлодара» қоғамдық бірлестігіне тапсырған. 

Павлодар орман және жануарлар әлемін қорғау жөніңдегі мекеменің басшысы Қайыржан Шайманов еліктің жағдайы қанағаттарлық екенін айтады. 

– «Сердца Павлодара» қоғамдық бірлестігінің мамандары оған күтім жасап, жылы сүт беруде.   Аяғына тұрып, толық қалпына келгеннен кейін біздің орманшылармен бірге қайтадан Усолка жайылымына жібереміз,  – дейді Қайыржан Шайманов.

 «Сердца Павлодара» бірлестігіне өткен тәулікте  елікпен бірге төрт күшік, бір мысық түскен.