Филармония қабылдаушы тараптың шақыруымен концерттік бағдарламамен саяхаттап жатыр, деп хабарлайды @Pavlodarnews.kz тілшісі.

Иса Байзақов атындағы облыстық филармония директоры Амангелді Қожановтың айтуынша, Өскеменге камералық хор мен «Нияз» би ансамблі аттанды.

– Біздің концерттік бағдарламамыздан көрермендер үлкен ләззат алады деп ойлаймын. Павлодарлық өнерпаздар өз кезегінде жергілікті ұжымдардың жұмыстарын тамашалай алады. Олар үшін бұл тәжірибе алмасу болады, – деп есептейді спикер. – Біз гастрольдік географияны кеңейтіп қана қоймай, бірегей хорымыздың өнерін тыңдауға мүмкіндік беріп жатырмыз. Республикада хор Ақтөбе, Астана, Алматы, Қарағанды, Павлодар қалаларында ғана бар. 

Гастрольдік бағдарлама туралы өнерпаз, камералық хор жетекшісі Тимур Көпжасар айтып берді. 

– Бірнеше жылдан бері біз әртүрлі жанрларда тәжірибе жасап, концерттерді концептуалды етуге тырыстық және спектакльді рокқа арнауды көптен жоспарлап жүрміз, – деді өнерпаз. – Біз өте танымал топтар мен музыканттардың композицияларын орындап, әр жылдардағы музыканы қамтыдық: «Queen», «Кино», «Orda», «Beatles», тіпті Майкл Джексон. Оның «Beat It» композициясы бір кездері рок жанрындағы жыл әні аталды. 

Спикер Иса Байзақов атындағы филармонияның камералық хоры Қазақстандағы концептуалды түрде рок стилінде концерт жасаған алғашқы топ екенін баса айтты.