Ең жиі қолданылатын жүйе – оқушылардың электронды күнделігі, деп хабарлайды @Pavlodarnews.kz тілшісі.

Өңірлік білім беру мекемелерінің цифрлануының нәтижелері туралы облыстық білім басқармасы мәлімдеді. Қазіргі таңда мектептерде бірнеше цифрлық платформа қолданылады.

Орта білім беру ұйымдарына арналған Күнделік атты тегін автоматтандырылған ақпараттық жүйе электронды журнал мен күнделік қызметін атқарады. Бұл жүйеге 358 мектеп, 16 200 мұғалім, 118 233 оқушы және 79 314 ата-ана тіркелген.

Білім саласындағы автоматтандырылған жүйелер азаматтарға 36 түрлі мемлекеттік қызметті онлайн форматта алуға мүмкіндік береді. Бұл жүйенің құқық иесі – ҚР Оқу-ағарту министрлігі.

— 2024 жылдан бастап барлық мемлекеттік мектептерде Ұстаз платформасы енгізілді. Ол педагог қызметкерлердің мониторингі мен аттестациялау процесіне арналған, – деп жазылған ресми хабарламада.

E-Kitaphana – кітапхана қорын басқаруға арналған орталықтандырылған автоматтандырылған жүйе – облыстағы барлық мектеп пен 13 білім бөліміне таралған. Жүйенің иесі – «Транстелеком» АҚ. Қаржыландыру жергілікті бюджет есебінен жүзеге асырылады.

— Фаворит атты бұлтты бухгалтерлік жүйе 2021 жылдың наурыз айында енгізілген. Бұл жүйе бюджет жоспарлау мен есептіліктің ашықтығын қамтамасыз етеді. Оны 575 білім беру ұйымы қолданады. Жүйеге қосылу құны – 243,7 миллион теңге, деді білім беру ұжымының басшылары.

INDIGO және Balabaqsha SmartNation жүйелері мектепке дейінгі ұйымдарға кезекке тұру мен басқаруды автоматтандырады. Ата-аналар ЭЦҚ арқылы өтінім жолдай алады. Бұл жүйелерге қол жеткізу шығындары жергілікті бюджеттен төленеді.

Температуралық режимді қадағалау жүйесі 323 мектепте орнатылған. Датчиктерден келіп түсетін мәліметтер әр бес минут сайын жаңарып отырады. Бұл ақпаратқа мектеп директорлары, білім бөлімдерінің қызметкерлері, ата-аналар мен әкімдіктер қол жеткізе алады.

Облыстағы барлық 354 мектеп цифрлық білім беру платформаларына қосылған. Оның ішінде 154 мектеп «BilimLand» компаниясының «OnlineMektep» платформасын пайдаланады (құны – 70,7 миллион теңге). Қалған білім беру ұйымдары Daryn Online, Bilim App, Edu Page сынды басқа да платформаларды қолданады.