Бұдан былай сауда нүктелеріндегі кеңістіктің 30%-ына қазақстандық өнімдер орналасуы керек, деп хабарлайды @Pavlodarnews.kz тілшісі.

10 қазаннан бастап Қазақстанда ҚР Сауда және интеграция министрлігі әзірлеген ішкі сауда ережелеріне түзетулер күшіне енді. Құжатқа сәйкес бірінші, екінші, үшінші және төртінші санаттағы сауда нысандары тауарларды сатуды жүзеге асыру кезінде сауда алаңының кемінде 30%-ын азық-түлік емес тауарларымен қамтуы тиіс.

Павлодар облысы бойынша сауда және тұтынушылардың құқықтарын қорғау департаментінің басшысы Дәулен Қабдушевтің айтуынша, бұған дейін ереже азық-түлік өнімдеріне қатысты болған.

- Әзірге тексеру жұмыстары басталған жоқ. Мамандар түсіндіру жүргізіп жатыр. Павлодар облысында бұл талаптарды жалпы ауданы 100 шаршы метрден асатын сауда үйлері орындауы керек. Облыс орталығында бұл критерийге бірнеше сауда орны жатады, - дейді Дәулен Қабдушев.

Талаптардың орындалуына қатысты шаралар тексеру парақшаларындағы өзгерістер енгізілгеннен кейін қолға алынбақ.

Мамандардың айтуынша, азық-түлік өнімдері бойынша талап орындалады. Өңірде кей сауда нүктелеріндегі отандық тауардың үлесі 50%-дан асып кетеді.

- Павлодарлық сөрелерде нан-тоқаш өнімдері, жұмсақ қаптамадағы сүт сияқты тауарлар жоғары сұранысқа ие. Тұрғындар жеті күндік сақталу мерзімі бар сүтті жиі тұтынады. Жазда супермеркеттер мен дүкендерде өңірде шығарылған жұмыртқа пайда болады, - дейді Дәулен Қабдушев.

Жыл басынан бері облыста «Сауда қызметін реттеу туралы» ҚР Заңының 168 бұзушылығы анықталды. Олардың ішінде тауарларын сауда алаңында отандық өндірістің азық-түлік 30% орналастырмағаны үшін төрт нысан жауапкершілікке тартылды.