Партия мүшелері бірқатар оң өзгерістерге назар аударды, деп хабарлайды @Pavlodarnews.kz тілшісі.

Қыркүйек айының басында жарияланған Мемлекет басшысының Жолдауы елдің қоғамдық-саяси өміріндегі маңызды кезеңге айналды. «AMANAT» партиясының мүшелері Президент айқындаған стратегиялық бағыттар қоғамның әртүрлі салаларында – педагогтерден бастап азаматтық сектор белсенділеріне дейін – кеңінен қолдау тапқанын атап өтуде.

Облыстық білім және ғылым қызметкерлері кәсіподағының төрайымы Гүлбарам Наурызбаева Жолдаудың ел дамуына тың серпін бергенін айтады.

– Бірнеше жыл бұрын жасанды интеллекттің жаппай енгізіліп, цифрлық трансформация болатынын айтқанда, бұл бізге ғылыми фантастика секілді көрінер еді. Ал бүгінде бұл – шындық. Қазақстан заман ағымына сай ғана емес, кей тұстарда өзге мемлекеттерден озып келеді, – деді Гүлбарам Наурызбаева.

Оның айтуынша, Жолдауда технологиялық жетістіктермен қатар, елдің рухани құндылықтары мен ұлттық дәстүрлерін сақтау қажеттілігіне де баса назар аударылған. Әсіресе Президенттің білім мен ұстаздардың қоғамдағы рөліне берген бағасы жүрегінен орын тапқан.

– Ұстаз – қоғамдық үдерістердің катализаторы. Жаңа буынның қалыптасуы дәл осы мектеп қабырғасынан басталады. Ал жасанды интеллект ешқашан рухани тәрбиені, патриотизм мен мәдени құндылықтарды алмастыра алмайды, – деп атап өтті спикер.

«AMANAT» партиясының мүшесі Асылбек Туғанбай Жолдауда алдағы бір жылға арналған әлеуметтік-экономикалық дамудың нақты бағыттары белгіленгенін атап өтті. Ол партиялық бастамалардың жүзеге асуына ерекше тоқталды.

– «Қарызсыз қоғам» бағдарламасы аясында 17 миллионнан астам қазақстандыққа қаржылық сауаттылық бойынша білім алу мүмкіндігі берілді. Бұл – үлкен жетістік, – деді ол.

Сондай-ақ оның айтуынша, «Тaзa Қазақстан» экологиялық бастамасы тек сенбілікпен шектелмейді.

– Бұл – қоғамдағы мінез-құлық мәдениеті, әр азаматтың жеке жауапкершілігі. Біз бұл мәдениетті – тазалықтан бастап табиғатқа деген көзқарасқа дейін – дамытуымыз керек, – деді Асылбек Туғанбай.

Ол сондай-ақ пайдаланылмай жатқан немесе заңсыз алынған жерлерді мемлекет меншігіне қайтаруға бағытталған «Жер аманаты» бағдарламасының жүзеге асуына да тоқталды. Жыл соңына дейін қайтарылуы тиіс 130 мың гектар жердің 117 мыңы елге қайтарылғанын мәлімдеді.