Оны кәсіби шеберлігі, жауапкершілігі және көмекке деген шынайы ұмтылысы ерекшелендіреді, деп хабарлайды @Pavlodarnews.kz тілшісі.

2025 жылдың екінші жартыжылдығының қорытындысы бойынша Айнұр Оқапова Қазақстан Республикасы Мемлекеттік кірістер органдары байланыс орталығының үздік операторы болып танылды. Халық саны орташа өңірлер арасында ол дара шығып, құрметті бірінші орынды иеленді.

– Күн сайын байланыс орталығының мамандары салық төлеушілерден ондаған өтініш қабылдайды. Әр қоңыраудың артында нақты жағдай мен кәсіби қолдауға деген үміт жатыр. Айнұр әрбір адамды құрметпен және ашық ниетпен қарсы алады. Ол жоғары дайындық деңгейін көрсетіп, мұқият тыңдай білудің, ең қиын сәттерде сабыр сақтаудың және стандартты емес жағдайларда оңтайлы шешім табудың үлгісін көрсетіп келеді, – деді Павлодар облысы бойынша Мемлекеттік кірістер департаментінің баспасөз қызметі.

Ведомствода атап өткендей, «Үздік оператор» мәртебесі – бұл жай ғана атақ емес, күнделікті қажырлы еңбектің, жүйелі жұмыстың және сапаның тұрақты көрсеткіштерінің жемісі. 

– Айнұр кеңес берудің толықтығын, күрделі нормаларды қарапайым әрі түсінікті тілде түсіндіре білу қабілетін және салық төлеушілердің жоғары ризашылығын тұрақты түрде дәлелдеп келеді. Байланыс орталығы – мемлекеттік кірістер органдарының қазіргі заманғы сервистік моделінің маңызды құрамдас бөлігі. Айнұр Оқапова сынды мамандардың арқасында азаматтардың мемлекетке деген сенімі нығайып, салық төлеушілердің мәселелері жедел шешімін тауып, ведомствоның оң имиджі қалыптасуда, – делінген хабарламада.

Ұжым Айнұр Сансызбайқызын лайықты жеңісімен шын жүректен құттықтайды. Оған алдағы уақытта да кәсіби өсу, шығармашылық шабыт және салық төлеушілердің шынайы алғысына бөлене беруді тілейді.