Тәртіп сақшылары жанжал көп орын алатын ойын-сауық орындарының маңына орналастырылды, деп хабарлайды @Pavlodarnews.kz тілшісі.

Павлодар облысы ПД қоғамдық қауіпсіздік басқармасының бастығы Азамат Күркебаевтың айтуынша, жұма мен жексенбі аралығындағы түнгі уақытта 27 кафе мен мейрамхана маңына полиция патрульдері қойылған. Қызметкерлер жағдайды тек сыртта ғана емес, ішкі кеңістікте де бақылауда ұстап, әкімшілікпен және күзет қызметімен өзара әрекеттескен. Олар келушілердің агрессивті мінез-құлқына жедел жауап беріп, жанжалдарды басталмай тұрып тоқтатуға күш салған.

– Егер ойын-сауық орнында адам өзін агрессивті ұстап, жанжал туындау қаупі болса, куәгерлер 102 нөміріне хабарласады немесе жақын маңда жүрген патруль дер кезінде әрекет етіп, төбелес пен қоғамдық тәртіп бұзушылықтың алдын алады, – деп түсіндірді Азамат Күркебаев. – Сондай-ақ тыныштықты бұзу мәселесіне ерекше назар аударылды. Облыс орталығында мұндай деректер бойынша шақыртулар саны азайғаны тіркелді. Бұл кешкі және түнгі уақытта құқықбұзушылықтардың алдын алуға бағытталған пилоттық жобаның енгізілуімен байланысты.

Мерекелік күндердің қорытындысы бұл тәсілдің тиімділігін көрсетті. Бес күн ішінде бірде-бір ауыр қылмыс тіркелмеген. Отбасылық-тұрмыстық сипаттағы жекелеген шақыртулар, ұсақ ұрлықтар мен құқықбұзушылықтар болғанымен, ірі оқиғалардың алдын алу мүмкін болды.