Маман алдын алудың маңыздылығын атап өтті, деп хабарлайды @Pavlodarnews.kz тілшісі.

Павлодар облысында дәрігерлер деменциялық синдром мен Альцгеймер ауруына шалдыққан науқастар санының өсіп жатқанын тіркеуде. Павлодар қалалық №1 ауруханасының неврология бөлімінің меңгерушісі, жоғары санатты дәрігер-невропатолог Людмила Титаренконың айтуынша, нейродегенеративті аурулар мәселесі бүгінде әлем бойынша ең өзекті проблемалардың біріне айналып отыр.

Маманның айтуынша, өмір сүру ұзақтығының артуы жасқа байланысты аурулардың, соның ішінде деменция, ми қан тамырларының атеросклерозы және Альцгеймер ауруының көбеюіне тікелей әсер етеді.

- Әлем бойынша 2030–2050 жылдары Альцгеймер ауруына шалдыққан адамдар саны едәуір артады деген болжам бар. Қазірдің өзінде көптеген отбасылар туыстары мен жақындарының ерте деменциялық синдромына тап болып отыр, — деді Людмила Титаренко.

Оның сөзінше, Павлодар қалалық №1 ауруханасының неврология бөлімінде мұндай бұзылыстарды ерте диагностикалау жүргізілуде. Науқастар арнайы шкалалар мен тесттердің көмегімен тексеріліп, кейін емдеу мен бақылау тағайындалады.

Дәрігер Альцгеймер ауруын ерте анықтаудың заманауи әдістеріне де ерекше тоқталды. Қазақстанда алғашқы белгілер пайда болғанға дейін бірнеше жыл бұрын деменцияға бейімділікті анықтауға мүмкіндік беретін талдаулар пайда болған.

- Қазіргі таңда «Олимп» диагностикалық орталығы Альцгеймер ауруын ерте анықтауға арналған талдау жүргізуде. Зерттеу нейродегенеративті өзгерістердің дамуына байланысты амилоид тау-181 ақуызын анықтауға мүмкіндік береді. Талдау ауру қаупін алғашқы клиникалық белгілер байқалғанға дейін сегіз-он жыл бұрын көрсете алады, — деп түсіндірді невролог.

Маман есте сақтау қабілеті, назар мен когнитивтік функциялар нашарлаған алғашқы белгілер байқалған жағдайда дереу дәрігерге қаралу қажет екенін атап өтті, себебі деменция салдары көп жағдайда қайтымсыз болады.

- Егер адам есте сақтау қабілетінің бұзылуын, зейіннің төмендеуін, сыни ойлау мәселелерін байқаса, бірден неврологқа жүгіну керек. Қазір Альцгеймер ауруына шалдыққан пациенттер емханаларда есепке алынып, қажетті дәрі-дәрмекпен қамтамасыз етіледі, — деді Людмила Титаренко.

Дәрігердің айтуынша, профилактиканың да маңызы зор. Когнитивтік функцияларды сақтау үшін мамандар нейрондық байланыстарды үнемі дамытуға кеңес береді — шет тілдерін үйрену, музыкалық аспаптарды меңгеру, кроссворд шешу және интеллектуалдық ойындармен айналысу қажет.

Деменция мәселесінен бөлек, өңірде басқа да неврологиялық аурулардың таралу деңгейі жоғары болып отыр. Атап айтқанда, бөлімше пациенттерінің шамамен 60%-ы ауырсыну синдромдары, протрузиялар және омыртқаға түсетін шамадан тыс жүктеме мен күйзелістен туындайтын омыртқааралық жарықтарға байланысты ем қабылдайды.

Сондай-ақ дәрігер халықаралық неврологиялық форумдарда қазіргі таңда шашыраңқы склерозды және жүйке жүйесінің басқа да ауыр ауруларын емдеудің заманауи тәсілдері, соның ішінде жоғары тиімді моноклоналды антиденелерді қолдану мәселелері белсенді талқыланып жатқанын айтты.

Еске салайық, 2026 жылдың мамыр айында Людмила Титаренко «Қазақстандағы неврологияның дамуына қосқан үлесі үшін» төсбелгісімен марапатталған болатын.