Ұйғарым заңды күшіне енді және шағым жасауға жатпайды, деп хабарлайды @Pavlodarnews.kz.

Павлодар облыстық сотының әкімшілік істер жөніндегі сот алқасы мамандандырылған ауданаралық әкімшілік сотының ұйғарымына облыстық білім беру басқармасының жеке шағымын қарады.

Бұған дейін бірінші сатыдағы сот жеке кәсіпкер «КЕО мектебі»-нің өтінішхатын қанағаттандырды және оның ұйымын балаларға қосымша білім беруге мемлекеттік білім беру тапсырысының өнім берушілер тізіміне енгізуден бас тартуды заңсыз деп тану туралы шешімді дереу орындауға жіберді.

Алайда апелляциялық саты дереу орындауға негіз жоқ деген қорытындыға келді. Алқа талап қоюшы кейінірек орындау оның құқықтарына елеулі зиян келтіретіні туралы сенімді дәлелдер келтірмегенін, ерекше мән-жайлар анықталмағанын, дәлелдер алыпсатарлық сипатта болғанын, бірінші сатыдағы сот процеске басқа қатысушылардың құқықтары мен жария мүдделерін ескермегенін, себебі  2025 жылға арналған мемлекеттік сатып алу өз міндеттерін адал атқарып жатқан 40 ұйымға бөлінгендігін көрсетті.

Осыған байланысты апелляциялық саты төменгі сот ұйғарымының күшін жойды және шешімді дереу орындауға жіберуден бас тартты.