Елордада қысқы жүгіру маусымы ашылды, деп хабарлайды @Pavlodarnews.kz тілшісі.

Осы оқиғаға орай қалада 200-ден астам спортшы қатысқан «Astana Run қыс» жарысы өтті. Олардың қатарында атақты спортшы әрі жаттықтырушы Виктор Бондарь бастаған павлодарлықтар да болды.

61 жасар спорт ардагері, Павлодар ақпараттық технологиялар колледжінің дене шынықтыру пәнінің мұғалімі жеңіл атлетикадан бірнеше дүркін әлем және Азия чемпионы екендігін айта кеткен лазым.

Бұл жолы да атақты спортшы жарыстан шет қалмай, өз жас санатында мәреге бірінші жетті. Жалпы, павлодарлықтар екі алтын, үш күміс және бір қола медаль жеңіп алды. Тағы бір ұстаз Арман Тұрсынов павлодарлықтарға бір күміс медаль әкелді.

- Жарыс қиын болды: күннің суықтығы, тайғақ жол және өзіңді жеңе білу. Бірақ дәл осындай жағдайда өзіңіздің қолыңыздан не келетінін түсінесіз. Бәсекелестер мықты болды, трассадағы атмосфера күш-қуат берді, қатысушылар мен көрермендердің қолдауы мәреге дейін қарқынымызды төмендетпеуге көмектесті, - деп бөлісті Арман Тұрсынов.

Спортшы жүгірумен бір жылдай айналысып келеді, оған қоса футболды да ойнайды. Арман Тұрсынов ҚР Қарулы Күштеріндегі қызмет өткеруіне байланысты спортта үзіліс жасады. Павлодарлық спортпен жұмыстан бос уақытында айналысады: жеңіл атлет Аманжол Шамкенов атындағы мектеп-лицейде педагог-ассистент болып жұмыс істейді.