Соңғы 3 жылда терезеден 30-дан астам бала құлаған,  деп хабарлайды @Pavlodarnews.kz.

Облыстық білім басқармасы жыл сайын көптеген балалар биіктіктен құлап зардап шегіп жатқанын айтып, дабыл қақты. 

Статистика бойынша, соңғы 3 жылда терезеден 31 бала құлап, оның ішінде 8 бала қайтыс болған. 

- Бұл туралы жиі айтылғанымен, қайғылы жағдайлар азаймай отыр. Күн жылынып, терезелердің ашылуына байланысты балалардың ашық терезеден құлауы қайғылы жағдайға алып келуде. Көптеген ата-аналар терезені ашық қалдырудың бала өмірі үшін қауіпті екенін ұмытып кетеді, - делінген хабарламада.

Басқармасы ата-аналарды негізгі қауіпсіздік ережелерін сақтауға шақырады: 

- Балаларды қараусыз қалдырмаңыз; 

- Балалардың ашық терезелердің жанында ойнауына жол бермеңіз; 

- Терезеде москиттік торлар болғанымен олар темір тор секілді болмайтынын есте сақтаңыз; 

- Баланың өздігінен терезенің алдына шығып алмауы үшін жиһазды терезеден алысырақ жерге орналастырыңыз; 

- Балаңызға терезеден бір нәрсе көрсету мақсатында оған терезенің алдында тұруды үйретпеңіз; 

- Бөлмені желдету үшін терезенің көзін пайдаланыңыз немесе терезенің жоғарғы жағын ашып желдетіңіз; 

- Терезенің тұтқаларын алып тастаңыз немесе арнайы құлпы бар тұтқаларды орнатыңыз; 

- Терезеге бекіткіштер мен бұғаттағыштар орнатыңыз. 

Балаңыздың өмірі мен денсаулығы сіздің қолыңызда.