Қысқы аяз бен құбылмалы ауа райына қарамастан, өңір шаруалары өткен жылды табысты аяқтады, деп хабарлайды @Pavlodarnews.kz тілшісі.

2025 жылдың қорытындылары жаңа маусымға берік негіз болды, әсіресе Президент қойған – әртараптандыру арқылы ауыл шаруашылығы өндірісін арттыру міндеті аясында. Бұл туралы ҚР Ауыл шаруашылығы министрлігінде мәлімдеді.

Болжамнан жоғары өсім

АӨК өнімінің жалпы көлемі 571,4 млрд теңгені құрады. Нақты көлем индексі 109,6 пайызға жетіп, АШМ болжамынан асып түсті. Өсімдік шаруашылығының үлесі – 368 млрд теңге (+15,5%), мал шаруашылығы – 200,5 млрд теңге.

АӨК-тің негізгі капиталына салынған инвестициялар 224,8 млрд теңгеге дейін өсіп, өткен жылмен салыстырғанда бір жарым есе артты. Тамақ өнеркәсібіне 22,2 млрд теңге инвестиция салынды – бұл бес еседен астам өсім. Бір жылда 25 инвестициялық жоба іске асырылды, 2026 жылы тағы 15 жобаны іске қосу жоспарлануда.

Қорымен алынған өнім

Егіс маусымы өңірдің тәуекелі жоғары егіншілік аймағы ретіндегі мәртебесін тағы бір мәрте дәлелдеді – мұнда әр нәтиже маңдай термен келеді. 2025 жылы 836,8 мың гектар дәнді және дәнді-бұршақты дақылдар орылды. Жалпы өнім 1,105 млн тоннаны құрап, орташа түсім 13,2 ц/га болды.

Картоп өсірушілер кезекті рекорд орнатты – 894 мың тоннадан астам өнім жиналып, ішкі нарықтағы бағаны тұрақтандыруға мүмкіндік берді. Көкөніс өндірісі 230 мың тоннадан асты. Майлы дақылдардың егіс алқаптары едәуір ұлғайтылды.

Астықтың сапасы бағаның тұрақты сақталуына мүмкіндік берді. Элиталық тұқымдарды пайдалану мен минералды тыңайтқыштарды енгізу көлемінің артуы маңызды рөл атқарды – бір жылда 99 мың тоннадан астам тыңайтқыш сатып алынды.

Жаңа маусымға дайындық

Болашақ өнімге 171,1 мың тонна тұқым толық көлемде, сақтандыру қорын ескере отырып дайындалды. Дәнді, майлы, азықтық дақылдардың тұқымдары және тұқымдық картоп дайындалды. 

Мал азығын дайындау жоспардан озып орындалды: ірі азықтармен қамтылу қажеттіліктен жоғары, бұл шаруашылықтарға қыстақтан сенімді өтуге мүмкіндік берді.

Мал шаруашылығы: тұрақты динамика

Сала 200,5 млрд теңгенің өнімін өндірді. Оны дамытуға бюджеттен 7,7 млрд теңге бағытталды. Сүт фермаларын салу және жаңғырту жобалары белсенді іске асырылып, сүт өндірісі 7,5 пайызға өсіп, 254,5 мың тоннаға жетті.

Тірі салмақтағы ет өндірісі 109,9 мың тонна, жұмыртқа – 199 млн данадан асты. ІҚМ басы 475 мың басқа дейін өсті, жылқы, шошқа және құс саны артты. Еуропа мен Ресейден жоғары өнімді асыл тұқымды мал әкелу жалғасуда.

Құс шаруашылығы: өсім және сын-қатерлер

Мал басының артуына және нарықта өнімнің болуына қарамастан, құс өсірушілер өзіндік құнның өсуіне тап болуда. Негізгі мәселелер – қымбат жем-шөп, импорттық витаминдер, әлсіз асылдандыру базасы және шетелдік жеткізілімдерге тәуелділік.

Өндірушілер мемлекеттік қолдаудың маңызын атап өтеді: субсидиялар бағаны ұстап тұруға және бәсекеге қабілеттілікті сақтауға мүмкіндік береді. Саланың тұрақтылығы көп жағдайда АШМ-нің алдағы шешімдеріне байланысты.