Жұмыстар келесі аптада басталады, деп хабарлайды @Pavlodarnews.kz тілшісі.

Облыс әкімі Асайын Байханов аппараттық жиын барысында көпқабатты үйлерде пайда болатын жәндіктермен күрес жұмыстарын күшейтуді тапсырды. Аймақ басшысының айтуынша, облыс орталығында 1510 көпқабатты үй бар. 

– Жертөлелерде былтырдан қалған шыбындарды жою мақсатында сәуірдің жетінші жұлдызынан бастап, өңдеу жұмыстарын бастауды тапсырамын. Мысалы, кезінде қала әкімі болғанда Павлодарда 270 көпқабатты үйлердің жертөлелерін су басатын. Олар жеке бақылауда болатын. Өйткені, бұл үйлерді басқаратын ұйым болмады. Салдарынан кәріз жүйелерінің суы жиналады. Жертөледе жәндіктер қыстап қалып, жайылманың жәндіктерінен бұрын қанатқа тұрады, – дейді Асайын Байханов.

Зерттеу жұмыстарын жауапты органдар бірлесіп жүргізеді. 

Айта кетейік, тұрғындармен кері байланыс орнату үшін бірыңғай call-орталық жұмыс істейді. 

Биыл жайылымдық аумақтағы зиянкестерге қарсы күрес үшін 182 мың келі препарат қолдану жоспарлануда, бұл өткен жылмен салыстырғанда 25 мың келіге артық. Биологиялық құралдың алғашқы партиясы, яғни, 40 мың келі наурыз айының соңында жеткізілді. Ал қалған бөлігі сәуірдің алғашқы онкүндігінде келеді деп күтілуде.

Мамандардың айтуынша, Bayer компаниясының препараттарынан бөлек, Польшада өндірілген жетілдірілген құралдар қолданылады.