Олар жүргізушілер мен жолаушыларды тазалықты сақтауға және жолға қоқыс тастамауға шақыруда, деп хабарлайды @Pavlodarnews.kz тілшісі.

Республикалық экологиялық «Таза Қазақстан» науқаны шеңберінде Павлодар жолшылары бірнеше  нысанды тазалап, абаттандыру жұмыстарын жүргізді.

Ел бойынша өткен игі бастамаға «Жол активтері сапасының ұлттық орталығы» облыстық филиалының қызметкерлері үн қосып, қаладағы халық әншісі, композитор Майра Шамсутдинованың ескерткіші айналасында сенбілік өткізді.

Сонымен қатар, жолшылар «Казавтожол» мамандарымен бірлесіп, республикалық маңызы бар автожолдарда жүргізушілерге экопакеттер таратты.

– Шараның негізгі мақсаты – жүргізушілер мен жолаушыларды тазалықты сақтауға және жолға қоқыс тастамауға шақыру. Таратылған экопакеттер қоқысты жинауға арналған. Оларды жол бойындағы арнайы жабдықталған жерлерге тастауға болады, – деді «Жол активтері сапасының ұлттық орталығының» облыстық филиалында.

Жолшылардың «Таза Қазақстан» акциясына қатысуы автомобиль жолдары бойындағы экологиялық жағдайды жақсартуға ғана емес, сонымен қатар жол қозғалысына қатысушылар арасында экологиялық мәдениетті қалыптастыруға бағытталған.