Шаруа өзінің дұрыстығын дәлелдей алды, деп хабарлайды @Pavlodarnews.kz.

Павлодар облысында уәкілетті орган ауыл шаруашылығы өндірісімен айналысатын жауапкершілігі шектеулі серіктестікке 7200 гектар егістік жерді, жайылымдарды және басқа да жерлерді жалға берген.

Кейін мемлекеттік орган аталмыш жердің бір бөлігін – 6000 гектардан астамын – мақсаты бойынша пайдаланылмағанын дәлел ретінде келтіріп, алып қою туралы талап қоюмен сотқа жүгінген (Жер кодексінің 65-бабының 1-тармағының 1-тармақшасы).

Бірінші сатыдағы сот жерді мақсаты бойынша пайдаланылмағаны туралы жеткілікті дәлелдемелердің жоқтығын атап көрсетіп, талап қоюды қанағаттандырмаған. Сондай-ақ, орган бұзушылықтарды түзету туралы ұйғарым шығарғаннан кейін жерді қайта зерттемегені атап өтілген.

Апелляцияны қарау кезінде сот ЖШС мен фермерлік шаруашылық бірлескен қызмет туралы шарт жасасқанын, оған сәйкес даулы жер 200 бас жылқы ұстау үшін пайдаланылатынын анықтады. 3000 гектардан астам аумақта егіс жұмыстары жүргізілгенін растайтын құжаттар ұсынылған. 

Павлодар облыстық соты бірінші сатыдағы соттың қорытындыларын қолдады, сонымен қатар мыналарды қосымша атап өтті: 

• берілген ұйғарымның орындалуы туралы актілер болмаған; 
• өкілдік және атқарушы органдардың бірлескен шешімімен белгіленген ауыл шаруашылығы жерлерінің ең төменгі рұқсат етілген мөлшері туралы мәлімет ұсынылмаған;
• жер телімінің қай бөліктері – егістік жер немесе жайылым – алып қоюға жататыны көрсетілмеген.

Сонымен қатар, Жер кодексінің 92–94 баптарына сәйкес, жер телімінің бір бөлігін алып қою заңда көзделмеген.

Сондықтан, Жоғарғы соттың қаулысымен бірінші сатыдағы соттың шешімі өзгеріссіз қалдырылды. Қаулы заңды күшіне енді.