Қазақстанда 2013 жылдан бері қыркүйектің екінші жексенбісінде Отбасы күні атап өтіледі, деп хабарлайды @Pavlodarnews.kz тілшісі.

Мереке Президент Жарлығымен бекітілген. Оның негізгі мақсаты – отбасы институты арқылы мәдени құндылықтарды, дәстүрлер мен рухани мұраны сақтау, өскелең ұрпақты тәрбиелеу, демографиялық және әлеуметтік мәселелерді шешу жөніндегі жалпыұлттық мемлекеттік міндетті іске асыру.

Мемлекет басшысы өз сөздерінде: «Жастардың құқықтық санасына отбасындағы тәрбие зор ықпал етеді. Мұны ұмытпау керек» деп атап өтеді. Адамгершілік ұстанымдар, заңға құрмет және әділдіктің қадірін түсіну отбасында қалыптасады. Мемлекет пен қоғамның міндеті – елдің ортақ дамуына үлес қоса алатын азаматты тәрбиелеуде отбасының сенімді тірек болып қалуына жағдай жасау.

Президент Қазақстанның ұлттық арманы әділетті, қауіпсіз, таза және қуатты мемлекет құру екенін де атап өтеді. Бұл – әр азамат өз қабілетін жүзеге асырып, адал еңбегімен отбасының әл-ауқатын қамтамасыз ете алатын, мүмкіндіктері мол мемлекет. Осылайша, отбасына қамқорлық жасау жеке адамның міндетімен қатар ұлттық даму стратегиясының құрамдас бөлігіне айналады.

Мемлекет басшысы отбасылық құндылықтарды нығайтуды тұрақты әрі үйлесімді қоғамның кепілі ретінде қарастырады. Отбасында жан-жақты дамыған тұлға, жауапты азамат және елінің патриоты тәрбиеленеді. Сондықтан мемлекеттік саясат отбасы институтын жан-жақты қолдауға бағытталған. Оның беріктігіне жекелеген адамдардың әл-ауқаты да, Қазақстанның болашағы да байланысты.