Жаңа конституциялық орган мемлекеттің ішкі саясатын қалыптастыруға қатысады, деп хабарлайды @Pavlodarnews.kz тілшісі Ақордаға сілтеме жасап.

Президент Қасым-Жомарт Тоқаев Қазақстан Халық Кеңесінің құрамын бекітті. Кеңеске барлығы 126 адам енді. Оның алғашқы сессиясы Мемлекет басшысының өкіміне сәйкес 23-24 қыркүйекте Астанада өтеді.

Халық Кеңесінің құрамына қоғамдық қорлар мен кеңестердің, кәсіподақтардың, федерациялардың, этномәдени бірлестіктердің өкілдері, депутаттар, журналистер, ұстаздар, экологтар, кәсіпкерлер, заңгерлер, жазушылар, тарихшылар, спортшылар мен IT-мамандар кірді.

Қазақстан Халық Кеңесінің мүшесі атанғандардың арасында Павлодар облысының алты тұрғыны мен тумасы бар:

• Арман Мұсабеков – Павлодар облыстық мәслихатының депутаты, Ғ.Сұлтанов атындағы Павлодар облыстық ауруханасының директоры; 
• Бағдат Мусин – Спорттық бағдарламалау федерациясының президенті, «Қазақтелеком» АҚ басқарма төрағасы, Екібастұз қаласының тумасы; 
• Борис Поломарчук – Павлодар облысы қоғамдық кеңесінің мүшесі, Toraighyrov University оқытушысы; 
• Вера Ким – «Ұлттық волонтерлік желі» қауымдастығы нысанындағы заңды тұлғалар бірлестігінің төрайымы, Павлодар қаласының тумасы; 
• Лилия Стадникова – дарынды балаларға арналған №8 мектеп-лицейінің математика пәні мұғалімі; 
• Николай Арсютин – орыс, славян және казак этномәдени бірлестіктері қауымдастығының мүшесі, қоғам қайраткері. 

Жаңа Конституцияға сәйкес Қазақстан Халық Кеңесі – Қазақстан халқының мүддесін білдіретін жоғары консультативтік орган. 

Кеңес мемлекеттің ішкі саясатының негізгі бағыттары бойынша ұсыныстар мен ұсынымдар әзірлейді, қоғамдық келісім мен жалпыұлттық бірлікті нығайтуға қатысады. Сондай-ақ Құрылтайға заң жобаларын енгізіп, жалпыхалықтық референдум тағайындау туралы бастама көтере алады. 

Қазақстан Халық Кеңесінің құрамын бекіту Президенттің конституциялық өкілеттігіне жатады.