Жыл басынан бері өңірде мұндай заң бұзушылық үшін 13 адам әкімшілік жауапкершілікке тартылып, 4,8 миллион теңге айыппұл өндірілген, деп хабарлайды @Pavlodarnews.kz тілшісі.

Экологтар олардың пайда болу себептерінің бірі ретінде қалдықтарды шығару қызметіне ақы төлегісі келмейтін тұрғындардың бар екенін айтады.

Павлодар облысында рұқсат етілмеген қоқыс орындары бірнеше рет пайда болатын жерлер бар. Павлодар облысы бойынша экология департаменті басшысының орынбасары Әсет Сыздықовтың айтуынша, оның себептерінің бірі – кейбір тұрғындардың қоқыс шығару қызметіне жұмсалатын шығынды үнемдеуге тырысуы.

– Барлық адам қалдықтарын жұмыс істеп тұрған полигондарға апарғысы келмейді, себебі бұл ақылы қызмет. Сондықтан кейбіреулер қоқыстан өз бетінше құтылуға тырысады. Кейде хабарландыру арқылы қызмет көрсететін жеке тасымалдаушылар да қалдықтарды адам көзіне түспейтін жерлерге шығарып тастайды, – деді Әсет Сыздықов.

Экологтың айтуынша, құқықбұзушылардың көбі қоқысты жүк көлігімен әкелген кезде анықталады. Олардың арасында жеке тасымалдаушылар да, жөндеу жұмыстарынан кейін құрылыс қалдықтарын өздері шығаратын тұрғындар да бар.

Өткен жылы ҚР Әкімшілік құқық бұзушылық туралы кодексіне тиісті өзгерістер енгізіліп, мұндай құқық бұзушылықтар үшін жауапкершілік күшейтілді. Жеке тұлғаларға шамамен 100 АЕК мөлшерінде айыппұл салынады, ал құқық бұзушылық қайталанған жағдайда оның мөлшері 200 АЕК-ке дейін жетеді. Сонымен қатар мұндай жағдайда құқық бұзушылық жасауға пайдаланылған мүлікті тәркілеу қарастырылған.

Мұндай фактілер рейдтер кезінде анықталады. Экология ведомствосының мамандары басқа қызмет өкілдерімен бірлесіп, заң бұзушылықтар тіркелген аумақтарға шығады.

Соның бірі – Суворов зиратының маңындағы аумақ. Облыс прокуратурасының бастамасымен полиция қызметкерлерімен бірлесіп рейд жүргізілді. Одан кейін бейнебақылау камераларын орнатып, ақпаратты Орталық жедел басқару орталығына қосу туралы шешім қабылданды.

– Нәтиже оң – қазір аумақ таза. Мұндай шараларды басқа да проблемалы учаскелерде қолданамыз. Щербақты көпірінің ар жағында, Солтүстік өнеркәсіптік аймақта және қала маңындағы басқа да аудандарда осындай бірнеше орын бар, – деді Әсет Сыздықов.

Қалдықтарды шығарумен айналысатын мамандандырылған қызметтің мәліметінше, Павлодар тұрғындары үшін 5 текше метр қоқысты шығару құны 20 300 теңгені құрайды. Егер қызметке екі жұмысшының көмегі кірсе, тариф 39 500 теңге болады.

Кәсіпорында сондай-ақ тығыздығы жоғары қалдықтарды, мысалы, шифер немесе кірпішті жүк көлігімен шығару құны 53 950 теңге екенін хабарлады. Ал тиеу мен шығаруды кәсіпорынның екі жұмысшысы атқарса, қызмет бағасы 69 950 теңгені құрайды.

Жақында павлодарлықтар салынып жатқан «Достық» шағын ауданының аумағында жаңа қоқыс орны пайда болғанын хабарлады. Сигналға жедел әрекет жасалып, кейін қалдықтар шығарылды.

Рұқсат етілмеген қоқыс орындарының басым бөлігі ғарыштық мониторинг арқылы анықталады. Жыл басынан бері Павлодар облысында осындай 97 нысан анықталып, барлығы жойылды.