Вера Ким су ұстайтын бөгеттердің, бекіністер мен үйінділердің техникалық жай-күйімен танысты, деп хабарлайды @Pavlodarnews.kz тілшісі.

«AMANAT» партиясының облыстық филиалы баспасөз қызметінің мәліметінше, Вера Кимнің Павлодар облысына сапары жалғасуда. Бүгін мәжілісмен Атамекен кентінде және Кенжекөл ауылында болды. 

Павлодар қаласы Төтенше жағдайлар басқармасының өкілдері хабарлағандай, 2023-2024 жылдардағы қысқы кезеңде қала мен елді мекендердің көшелерінен 640 мың тоннадан астам қар шығарылды.

– Алдын алу және ескерту іс-шараларын жедел жүргізудің арқасында су тасқынының бірінші кезеңі оқиғасыз өтті. Шығыс Қазақстан облысы су қоймаларының Жоғарғы-Ертіс каскадынан су жіберу кезеңінде су тасқыны кезеңінің екінші кезеңі күтілуде, – делінген хабарламада.

Мәселен, Кенжекөл ауылы мен Атамекен кентіндегі тұрғын үйлерді су басудың алдын алу үшін оларды нығайту мақсатында жыл сайын үйінділерге топырақ әкелу жұмыстары жүргізіледі. Қазіргі уақытта Атамекен кентінде 2000 тоннаға жуық топырақ бар, 50 метрге жуық үйінді нығайтылды, 2000 құм қапшығы бар. Кенжекөл ауылына 6500 тонна құм әкелінді, қаптар дайындалып, үйінділер нығайтылуда.

Үйінділерді қосымша нығайту бойынша жұмыс істеу үшін техника жұмылдырылды, тәулік бойы кезекші құтқарушылар бекітіліп, мамандар бекіністерді зерттеп, тексеріс жүргізуде.

– Жақын маңдағы ауыл тұрғындарының әл-ауқаты қазіргі кездегі тосқауыл ғимараттарының жағдайына байланысты. Хабарлау жүйелеріне тексеру жүргізу, кез келген жағдайға, соның ішінде зардап шеккен адамдарға көмек көрсетуге дайын болу қажет, – деп атап өтті депутат.

Сарапшылармен және ведомстволық құрылымдардың өкілдерімен әңгімелесе отырып, Вера Ким жағдайды үнемі бақылау қажеттілігіне назар аударды.

Естеріңізге сала кетейік, Мәжіліс депутаты облыс орталығында жұмыс отырысын өткізген болатын.