Алаяқтар телефон шалып, шетелге арзан жолдама сатып алуды ұсынады, деп хабарлайды @Pavlodarnews.kz тілшісі.

Жас жігіт арзан тур үшін шамамен 400 мың теңге аударған. Туристік агенттік жеңілдік жасап, жол жүру ақысын рәсімдеуге уәде берген, бірақ ақшаны алғаннан кейін жоғалып кетті. 

Тағы бір жағдайда, ер адам Польшаға ақша табу үшін барғысы келген, бірақ желідегі алаяққа сеніп, қаражатсыз қалған.

Полицияның мәліметінше, қылмыскерлер мессенджерлер арқылы әрекет етіп, өздерін туристік агенттіктердің қызметкері немесе делдал ретінде таныстырады да адамдарды сапар жолдамаларын арзан бағамен сатып алуға көндіреді.

– Бейтаныс нөмірлерге сенбеңіз, ресми келісімсіз ақша аудармаңыз және бірдеңеден күдіктенсеңіз, дереу полицияға хабарласыңыз, – деп сұрайды полицейлер.

Оңтүстік полиция басқармасының қызметкерлері өңір тұрғындарын аса сақ болуға шақырады, өйткені соңғы кездері алаяқтықтың бірнеше жаңа түрі тіркелуде.