Бұл форматтағы жария отырыс алғаш рет ұйымдастырылды, деп хабарлайды @Pavlodarnews.kz тілшісі.

Облыстық коммуналдық мүлікті жекешелендіру мәселесі талқылаудың негізгі тақырыбы болды. Оған облыстық мәслихат депутаттары, қоғамдық кеңес мүшелері, жергілікті атқарушы органдардың, ұйымдардың және азаматтық қоғамның өкілдері қатысты.

Облыстық қаржы басқармасының басшысы Жеңіс Шақатовтың айтуынша, бүгінде ведомствоның қарауында жекешелендіруге жататын 112 автокөлік бар. Жекешелендіру туралы ұсыныстар мемлекеттік заңды тұлғалардан – баланс ұстаушылардан түскен, себебі техника толықтай тозған және әрі қарай пайдалануға жарамсыз.

– Негізгі бөлігі Павлодар облысының полиция департаментіне тиесілі – 98 бірлік. Бұдан бөлек, денсаулық сақтау ұйымдарында он автокөлік бар: облыстық жедел медициналық жәрдем станциясының балансында – алты, психикалық денсаулық орталығында – екі, ал онкологиялық диспансер мен Павлодар ауданының емханасында – бір-бірден. Сондай-ақ көлік білім беру ұйымдарында, арнайы әлеуметтік қызметтерге мұқтаж балаларды қолдау өңірлік орталығында және әлеуметтік қорғау мекемелерінде де бар, – деді Жеңіс Шақатов.

Нысандарды жүзеге асыру мемлекеттік мүлік реестрінің веб‑порталы e‑qazyna.kz арқылы жүргізіледі. Аукциондар екі әдіспен ұйымдастырылады – бағаны көтеру және бағаны төмендету арқылы.

Облыстық мәслихаттың төрағасы Илья Теренченконың айтуынша, жария тыңдаулар ең маңызды әрі қоғамдық маңызы бар мәселелерді талқылау үшін өткізіледі.

– Ел Президенті шешім қабылдау процесіне депутаттық корпустың қатысуының маңыздылығын атап өтті. Сол тетіктердің бірі – қоғамдық ашықтық. Бүгін біз бұрын бұл рәсімдердің басқаша өткенін көріп отырмыз. Енді біз ашық әрі айқын сөйлейміз, бұл тек бастамасы ғана. Неге бұл іспен бюджет жөніндегі комиссия айналысады? Себебі қаражат облыстық бюджетке түседі және азаматтардың өмір сүру деңгейін арттыруға бағытталған негізгі қаржылық шығындар бойынша комиссиялар арқылы бөлінеді. Қазір біз алғашқы жария тыңдауларды өткізіп отырмыз, бұл – уақыт талабы, – деді Илья Теренченко.

Талқылау барысында «Қазақтелеком» АҚ Шығыс өңірі бойынша сервис фабрикасының өңірлік директоры, облыстық мәслихат депутаты Сабиден Мантыков полиция департаментінің өкілдерінен 98 автокөліктің қаншасы дәл тозығы жеткендіктен сатылатынын сұрады.

Сонымен қатар ол жекешелендіру тәжірибесімен бөлісті:

– Мысалы, көліктер 20 жыл пайдаланылған. Егер жүргізуші өзі сол көлікте жұмыс істеп, оны сатып алғысы келсе – біз оған мүмкіндік береміз. Аукцион үш кезеңде өтеді. Бірінші кезеңге тек жүргізушілер қатысады. Екінші кезеңге – барлық қызметкерлер. Ал үшінші кезең ашық түрде өткізіліп, сыртқы адамдар да қатыса алады, – деді Сабиден Мантыков.

Полиция өкілдерінің айтуынша, барлық көліктер сатуға қойылады. Өткен жылы шамамен 100 бірлік техника жүзеге асырылды. Бұған дейін департамент аукциондарды өз бетінше өткізу мүмкіндігіне ие болған.

Алайда жеті жыл бойы көліктер бокстарда жиналып, ретке келтірілмей тұрған, себебі сатуға шығару үшін барлық қосалқы бөлшектердің болуы талап етілген. Алдымен бағалаушы жұмыс жүргізді, бұл процесс ұзақ уақыт созылуы мүмкін, содан кейін көліктерді сатуға шығара бастады.

Депутаттардың пікірінше, жекелеген рәсімдерді, соның ішінде құжаттарға қатысты тәртіптерді жеңілдету қажет. Себебі көліктер бокстарда бос тұрған кезде электр энергиясы, салық, сақтандыруға және сақтауға қаражат жұмсалады. Осыған байланысты ұсыныстар жинақталып, құзырлы органдарға берілетін болды. Барлығы қолданыстағы заңнама аясында жүзеге асырылуы тиіс.

Депутаттар шығындардан бөлек, практикалық жағын да ескеру қажеттігін атап өтті: техниканың бір бөлігін тезірек жүзеге асырып, қалғанын металлға өткізу керек. Себебі, рәсімдерді жеңілдету процесті жеделдетіп, шығындарды азайтады.

Өткен жылы 134 көлік сатылды. Орташа құны шамамен 400 мың теңгені құрады. Облыс бюджетіне мүлікті сатудан 55,7 миллион теңге түсті, жоспар 43 миллион болған.

Ашық жария тыңдаулар азаматтар мен мүдделі тараптардың қатысуын қамтамасыз етіп, қоғамның жекешелендіру үдерістеріне деген сенімін нығайтады.

Павлодар тұрғыны Александр Бачкин аукциондарға қатысуда үлкен тәжірибесі бар болғандықтан, тыңдауларға арнайы келді.

– Саудаға қатысып жүргеніме 20 жыл болды. Қазір «Е‑Қазына» бағдарламасы бәрін ыңғайлы етіп жасайды: бағалау, есептен шығару, жинақтама, көліктің фотосуреттері қолжетімді. Бұл халық үшін өте ыңғайлы, – дейді Александр Бачкин.

Еске сала кетейік, жергілікті атқарушы органдар коммуналдық мүлікті жекешелендіруді Қазақстан Республикасының «Қазақстан Республикасындағы жергілікті мемлекеттік басқару және өзін‑өзі басқару туралы» Заңына сәйкес міндетті түрде жария тыңдаулар өткізе отырып жүзеге асырады. Тиісті өзгерістер өткен жылдың қыркүйегінде енгізілген.