Металлургтер шаһарында 265 көпқабатты тұрғын үй бар, деп хабарлайды @Pavlodarnews.kz тілшісі.

Ақсу қаласының әкімі Нұрлан Дүйсембиновтің айтуынша, оның ішінде үш шағын ауданда 101 көпқабатты тұрғын үйге ыстық су берілмеген. 

– Үшінші, бесінші және сегізінші шағын аудандарда аулаішілік жөндеу жұмыстары жүргізілуде. Мердігер сегізінші және бесінші шағын аудандарда 10 қыркүйекке дейін, үшінші шағын ауданда 15 қыркүйекке дейін жұмысты аяқтайды, – деді Нұрлан Дүйсембинов. 

Облыс әкімі Асайын Байханов аталған мәселені шешу бойынша жұмысты жеделдетуді тапсырды. 

– Реконструкия жүргізілген жерлерде абаттандыру жұмыстарын жүргізу керек. Бұл – үш қалаға да қатысты мәселе. Себебі, тұрғындарға қолайсыздық тудырады. Әрине, жердің бәрін қазу, ескі құбырларды жаңасына ауыстыру оңай жұмыс емес. Көп адамдар оны түсіне қоймайды. Дегенмен, абаттаныдыру жұмыстары көктемге қалып қоймасын,  – деп ескертті аймақ басшысы. 

Еске сала кетейік, облыс әкімдігінде өткен аппараттық жиында ауа райына байланысты жылу беру маусымын ерте бастау жайлы  айтылған болатын.