Балық ресурстарын заңсыз өндіру фактісі бойынша тексеру жүргізілуде, деп хабарлайды @Pavlodarnews.kz тілшісі.

Облыстық полиция департаменті баспасөз қызметінің мәліметінше, Беловка - Қалқаман автожолында «Ауди А6» маркалы автокөлік тоқтатылып, тексеру кезінде  жүксалғышта жалпы салмағы 559 келі болатын 14 қап мөңке балығы табылды. 

– Тексеру кезінде 47 жастағы жүргізушінің тасымалданатын жүкке құжаттары болмаған. Ол Қарасора көлінде балық аулаған. Автомашина соңғы процестік шешім қабылданғанға дейін арнайы айып тұрағына қойылды. Сот-биологиялық сараптама тағайындалды, балық ресурстарын заңсыз өндіру фактісі бойынша тексеру жүргізілуде, – деді департаментте. 

Айта кетейік, облыс аумағында 20 қазан - 19 қараша аралығында «Браконьер» жедел профилактикалық іс-шарасы өткізіледі.