Қатысушылар нақты ауылдық және аудандық жағдайларға негізделген кейстермен жұмыс істеді, деп хабарлайды @Pavlodarnews.kz тілшісі.

Облыстық филиал баспасөз қызметінің мәліметінше, семинарды Гүлнара Исенова, облыс бойынша «Әділдік және Өркендеу» қоғамдық қоры өкілдігінің басшысы, сыбайлас жемқорлыққа қарсы ерікті жүргізді. Ол мемлекеттік органдардың жергілікті деңгейде қалай жұмыс істейтінін жақсы білетін мол тәжірибеге ие.

Талқылаулар ашық түрде өтіп, тақырыпқа деген қызығушылықты арттырды.

Май аудандық филиалының атқарушы хатшысы Серік Солтанов жергілікті деңгейде басымдықтарды дұрыс анықтау керектігін айтты. Оның пікірінше, халықпен кері байланыс – кез келген жемқорлыққа қарсы шараның негізі. 

– Шешімдерді аудан әкімі мен жергілікті депутаттар бірлесіп қабылдауы тиіс. Сонда ғана олар халықтың нақты сұранысына сай болады, – деді ол.

Облыстық филиалдың атқарушы хатшысының міндетін атқарушы Айнұр Мұхамедьярова бұл семинар көптеген қатысушылар үшін өз жұмысына жаңаша көзқараспен қарауға мүмкіндік болғанын атап өтті.

Семинарда қоғамдық мониторингтің рөліне ерекше назар аударылды. Мемлекеттік органдардың қызметін, әлеуметтік бағдарламалардың орындалуын және заң талаптарының сақталуын депутаттар тарапынан тұрақты бақылау жұмыстағы кемшіліктерді анықтауға, мәселелерге жедел әрекет етуге және басқару процесінің ашықтығын арттыруға мүмкіндік береді.