Байқау екі кезеңнен тұрды, деп хабарлайды @Pavlodarnews.kz.

Баянауыл ауданының ішкі саясат, мәдениет және тілдерді дамыту бөлімінің ұйымдастыруымен қазақ прозасының классигі, алаш қайраткері, қазақтың көрнекті жазушысы, драматург, публицист, қазақ әдебиетін қалыптастырушылардың бірі – Жүсіпбек Аймауытов оқулары өтті. 

Іс-шара ақынның шығармаларын көпшілікке насихаттау, мемлекеттілікті қалыптастыруға қосқан еңбектерін жас буынға таныстыру, ұлы бабаларының есімдерін мақтан тұтуға баулу, өскелең ұрпақтың тұлға танудағы шығармашылық және зияткерлік қабілеттерін дамытуға бағытталды. 

Байқау екі кезең бойынша өткізілді. Бірінші кезеңде қатысушылар Жүсіпбек Аймауытовтың драмалық және прозалық шығармаларынан үзінді жатқа оқыса, екінші кезеңде драматургтың бір өлеңін мәнерлеп жатқа оқудан жарыс өтті. Оған аудандық жалпы білім беретін мектептердегі 7-11-сынып аралығындағы Жүсіпбек Аймауытовтың шығармашылығына қызығушылық танытатын 12 оқушы қатысты.

Қазылар алқасы оқушылардың табиғи дарындарын әділ бағалап, шын жүйріктерді анықтады.

Байқау нәтижесі бойынша бас жүлде М.Жүсіп атындағы мектебінің 10-сынып оқушысы СабинаМуратоваға бұйырды. Бірінші орынды Қ.Кемеңгеров атындағы мектебінің 10-сынып оқушысы Сабина Дихан иеленсе, екінші орынға Қаражар мектебінің 8-сынып оқушысы Нұртуған Қабиден ие болды. Үшінші орындарға Ж.Аймауытов атындағы мектебінің 10-сынып оқушысы Мөлдір Тасыбаева мен Ә.Марғұлан атындағы мектебінің 7-сынып оқушысы Ақнұр Нағымтай ие боды.