Осылайша, минералды тыңайтқыштардың алғашқы мультимодальды тасымалы жүзеге асты, деп хабарлайды @Pavlodarnews.kz тілшісі.

«Қазақстан темір жолы» ҰК» АҚ баспасөз қызметінің мәлімдеуінше, компания Екібастұздан Ұлыбританияға минералды тыңайтқыштарды алғашқы мультимодальды тасымалдауды ұйымдастырды. Жеткізу теміржол және теңіз көлігін пайдалана отырып, Транскаспий халықаралық көлік бағдары (ТХКБ) бойынша жүзеге асырылады. Маршрут Қазақстан, Каспий теңізі, Әзербайжан және Грузия арқылы өтеді. Әрі қарай Поти және Батуми порттары арқылы жүк Ұлыбританияға, Феликстоу портына теңіз арқылы жөнелтіледі.

Жаңа бағыт отандық кәсіпорындардың Ұлыбритания нарығына өнім жеткізу мүмкіндіктерін кеңейтті. ТХКБ-ны пайдалану бәсекеге қабілетті жеткізу мерзімдерін, көлік бағыттарын әртараптандыруды және халықаралық жеткізу тізбектерінің тұрақтылығын арттыруды қамтамасыз етеді.

«Қазақстан темір жолы» ҰК» АҚ халықаралық тасымалдардың географиясын дәйекті түрде кеңейтіп келеді. Бұған дейін компания қазақстандық өнімді Екібастұз – Майами бағыты бойынша экспорттық жөнелтуді ұйымдастырған болатын. Бүгінде ҚТЖ жүктерді АҚШ, Ұлыбритания, Бельгия, Польша, Чехия және басқа елдерге жеткізуді қамтамасыз етеді.

«Қазақстан темір жолы» ҰК» АҚ экспорттық сервистерін дамыту Қазақстанның сыртқы сауда әлеуетін нығайтуға, отандық өндірушілердің экспорттық мүмкіндіктерін кеңейтуге және Еуразияның негізгі көлік-логистикалық хабтарының бірі ретінде Қазақстанның ұстанымын нығайта отырып, халықаралық логистиканың тиімділігін арттыруға ықпал етеді.