Тәртіп сақшылары өрескел бұзушылықтың алдын алу мақсатында рейдтер өткізуде, деп хабарлайды @Pavlodarnews.kz.

«Учаске» жедел-алдын алу іс-шаралары аясында Екібастұз қаласы полиция басқармасының қызметкерлері қала дүкендерінің бірінде алкоголь өнімдерін заңсыз бөлшек саудада сату фактісін анықтады.

– Тексеру барысында сатушының 21 жасқа толмаған адамға спирттік ішімдік сатқаны анықталды, бұл Қазақстан Республикасы заңнамасының талаптарын өрескел бұзу болып табылады, – деді облыстық полиция департаментінде.

Қолданыстағы нормаларға сәйкес 21 жасқа толмаған адамдарға алкоголь өнімдерін бөлшек саудада сатуға тыйым салынады.

Сауда нүктесінің иесіне қатысты осы құқық бұзушылық үшін әкімшілік хаттама толтырылды.

Полиция кәсіпкерлер мен сауда қызметкерлеріне алкогольді сату кезінде заңмен белгіленген жас шектеулерін қатаң сақтау керектігін ескертеді. Мұндай шаралар жастардың денсаулығын қорғауға және жасөспірімдер ортасында құқық бұзушылықтардың алдын алуға бағытталған.