Турнир қазақстандық футбол тарихындағы ең танымал қорғаушылардың бірі Сейілда Икрамұлы Байшақовты еске алуға арналды, деп хабарлайды @Pavlodarnews.kz тілшісі.

Павлодар қаласындағы «Ертіс» мамандандырылған балалар-жасөспірімдер олимпиадалық резерв спорт мектебінің 2012 жылы туған футболшылар командасы кеңестік және қазақстандық аңызға айналған футболшы, Алматының «Қайрат» клубы мен КСРО құрамасының қорғаушысы Сейілда Байшақовты еске алуға арналған футбол турнирінде алтын медаль жеңіп алды.

Жарыс Тараз қаласында өтті. Турнир қорытындысы бойынша павлодарлық футболшылар жоғары дайындық деңгейі мен шеберлігін дәлелдеп, сенімді түрде бірінші орынды иеленді.

Жеңімпаздарды теміржол вокзалында салтанатты түрде қарсы алды. Командамен бірге бапкерлер Асқар Букеров пен Евгений Ермолаев болды. Чемпиондардың құрметіне өткен салтанатты шараға жұртшылық өкілдері, спорт қауымдастығы және бұқаралық ақпарат құралдарының өкілдері қатысты.

Турнир қазақстандық футбол тарихындағы ең танымал қорғаушылардың бірі Сейілда Икрамұлы Байшақовты еске алуға арналды. Ол спорттық мансабының басым бөлігін Алматының «Қайрат» клубында өткізіп, КСРО құрамасының намысын қорғады. Сейілда Байшақов – КСРО-ның халықаралық дәрежедегі спорт шебері, 1972 жылғы жастар арасындағы Еуропа чемпионатының күміс жүлдегері әрі отандық футболдың көрнекті тұлғаларының бірі. Спорттық мансабын аяқтағаннан кейін жаттықтырушы ретінде еңбек етіп, Қазақстан футболының дамуына зор үлес қосты.

«Ертіс» мамандандырылған балалар-жасөспірімдер олимпиадалық резерв спорт мектебі еліміздегі үздік футбол мектептерінің бірі саналады. Осы уақыт ішінде мұнда Павлодардың «Ертіс» клубында, Қазақстан Премьер-лигасының командаларында және түрлі жас санатындағы ұлттық құрамаларда өнер көрсеткен көптеген футболшы тәрбиеленді. Қазіргі таңда да мектеп жас спортшыларды дайындауды жалғастырып, олардың көпшілігі республикалық және халықаралық жарыстарда табысты өнер көрсетіп келеді.

Таразда өткен турнирдегі жеңіс павлодарлық жас футболшылардың жоғары дайындық деңгейін тағы бір мәрте дәлелдеп, өңірдегі балалар мен жасөспірімдер спорты үшін маңызды жетістік болды.