«Hola Amigos» – жоба авторлары тыңдармандары мен қонақтарын дәл осылай жылы қарсы алды. Латынамерикалық стильде безендірілген атмосфералы студияда өткен жазбаны @Pavlodarnews.kz тілшісі тамашалады.

Подкаст жүргізушілері – медиа саласында мол тәжірибесі бар Руслан Билялов, Назар Ахмаров және Ризабек Исабеков. Дебюттік шығарылымда олардың қонақтары «El Paso» би мектебінің жетекшісі Марина Шушункова және Қазақстанға бұл мектептің шақыруымен бірнеше рет келіп жүрген Бразилиядан келген кәсіби биші Рафаэль Дос Сантос болды.

Марина би мектебінің құрылу тарихы мен атауының мәнін айтып берді. «El Paso» сөзі испан тілінен аударғанда «Алға қадам» дегенді білдіреді. Жетекшінің айтуынша, дәл осы мағына мектептің философиясына негіз болған: әрбір оқушы сабаққа келе отырып, өз арманына қарай бір қадам жасайды – ол орындалмай қалған балалық арман болсын немесе ұзақ үзілістен кейін биге қайта оралу болсын. Бұл мән мектептің ұранымен де үндеседі: «Алға қадам – арманға қадам».

Жүргізушілердің ерекше қызығушылығын күншуақты Бразилиядан келген қонақ тудырды. Рафаэль Дос Сантос он жасынан бастап билеп келе жатқанын және бүкіл өмірін осы өнерге арнағанын айтты. Қазақстанға ол алғаш рет екі жыл бұрын Маринаның шақыруымен келген, содан бері қайта-қайта оралып жүр. Тың климат пен қысқы аязға қарамастан, ел туралы әсері өте жылы екенін жеткізді.

– Қазақстанда талантты бишілер өте көп. Мұндағы адамдар тез үйренеді және биді шын жүректен сезініп орындайды, – дейді Рафаэль.

Әңгіме барысында қонақтар солтүстік елдердің тұрғындары ыстық аймақтарға тән би құштарлығы мен темпераментін жеткізе алмайды деген кең тараған стереотипті де талқылады. Рафаэль бұл пікірмен келіспейтінін айтып, биді сезіну қабілеті климатқа да, ұлтқа да байланысты емес екенін, талант пен ынта кез келген елде бар екенін атап өтті.

Сондай-ақ қонақ өз өнерін тағы бір қырынан көрсетіп, гитараның сүйемелдеуімен ана тілі – португал тілінде махаббат туралы нәзік ән орындады.

«Hola Amigos» подкасты – ашық, еркін әрі әзіл-қалжыңы аралас жаңа форматтағы әңгіменің бастауы болды. Алғашқы шығарылым жобаның жылы реңкін айқындап, шығармашылық пен арман туралы әңгімелердің шекара мен қашықтыққа бағынбайтынын көрсетті.