Сауда нысанының құрылысы салынып жатыр, деп хабарлайды @Pavlodarnews.kz тілшісі.

Павлодар облысының әкімі Асайын Байханов Ертіс ауданындағы жұмыс сапарында «Қожанова» ЖК бөлшек сауда нысанының құрылысымен танысты.

Жеке кәсіпкер Құралай Қожанова супермаркет қыркүйек айында ашылады деп жоспарлап отырғанын жеткізді.

–  Керекті құжаттар дайындалып жатыр, алдағы уақытта техникалық паспорт аламыз, – дейді жеке кәсіпкер.

Оның таныстыруынша, супермаркеттің ішкі құрылысы жасалып жатыр. Бәрі жоспар бойынша қойылады.

–   Құрылыстың ауданы 1300 шаршы метрді құрайды, оң жақ қанатына азық-түлік, сол жақ қанатына тұрмысқа қажетті химиялық препараттар және тауарлар қойылады, – дейді ол.

Оның айтуынша, тауарларды жеткізетін компаниялармен келісім жасалған. Әрі азық-түлікті қоятын арнайы қойма дайын тұр.

Айта кетейік, инвестиция көлемі 300 миллион теңгені құрайды. 15 адамды жұмыспен қамту жоспарланып отыр. Супермаркетке «Сары мол» атауы қойылған.