Әлеуметтік қызмет мамандары күн сайын қарттарға, мүгедектігі бар азаматтарға және өмірлік қиын жағдайға тап болған отбасыларға көмек көрсетеді, деп хабарлайды @Pavlodarnews.kz тілшісі.

Қазақстанда қазан айының соңғы жексенбісінде атап өтілетін кәсіби мереке мұқтаж жандарға қолдау көрсетуді өмірлік міндетіне айналдырған мамандардың басын қосты.

Ауданның әлеуметтік қорғау жүйесінде жұмыспен қамту және әлеуметтік бағдарламалар бөлімі маңызды рөл атқарады. Мұнда алты мемлекеттік қызметші атаулы және басқа да әлеуметтік көмектерді тағайындаумен, мүгедектігі бар адамдарға қолдау көрсетумен, еңбек иммигранттарына рұқсат құжаттарының мерзімін ұзартумен, сондай-ақ ауылдық жерлерде тұрып, жұмыс істейтін мамандарды әлеуметтік қолдау шараларымен айналысады.

2025 жылдан бастап бөлімге қарасты екі мекеме жұмыс істейді. Олар – «Отбасын қолдау орталығы» және «Үйде әлеуметтік қызмет көрсету орталығы».

«Отбасын қолдау орталығының» мамандары тұрғындарға кеңес беріп, өмірлік қиын жағдайға тап болған отбасыларға көмек көрсетеді. Сондай-ақ мәселелерді дер кезінде анықтап, оларды шешу жолдарын табуға атсалысады. Жыл басынан бері орталық 256 кеңес берген. Оның ішінде 102 өтініш жұмыспен қамтуға жәрдемдесу мәселесіне қатысты болса, тағы 57 кеңес әлеуметтік көмек, 34-і білім беру, 16-сы денсаулық сақтау, 15-і тұрғын үй мәселелері бойынша берілген. Жеті адам қайырымдылық көмек алу жөнінде кеңес сұраса, 25 өтініш өзге бағыттарды қамтыған.

Әлеуметтік қорғау жүйесінде «Үйде әлеуметтік қызмет көрсету орталығының» да орны ерекше. Мұнда 41 әлеуметтік қызметкер еңбек етеді. Олар жалғызбасты зейнеткерлерге, мүгедектігі бар адамдарға және ерекше қажеттіліктері бар балаларға көмек көрсетеді. Қазір орталықтың қамқорлығында 128 адам бар.

Әлеуметтік қызметкерлер өз қамқорлығындағы адамдарға күнделікті тұрмыстық істерді атқаруға, түрлі мәселелерді шешуге және қажетті қолдау алуға көмектеседі. Көптеген қызмет алушы үшін мұндай көмек өз бетінше өмір сүру мүмкіндігін және қалыптасқан өмір салтын сақтауға жағдай жасайды.

Ауданның ауылдық округтері мен елді мекендерінде жұмыс істейтін мамандар да тұрғындарды әлеуметтік қолдауға елеулі үлес қосып келеді. Олар халықпен тікелей байланыс орнатып, туындаған мәселелерді шешуге көмектеседі және жергілікті жерде көмек көрсетуді үйлестіреді. Сонымен қатар, дәрігерлік амбулаториялар жанындағы әлеуметтік қызметкерлер пациенттердің әлеуметтік мәселелерін шешуге жәрдемдесіп, медициналық ұйымдармен бірлесе жұмыс істейді.

Әлеуметтік саладағы жұмыс кәсіби білім мен жауапкершілікті ғана емес, төзімділікті, жанашырлықты, адамды тыңдап, қиын сәтте қолдау көрсете білуді талап етеді. Кәсіби мереке күнделікті еңбегімен ерекше қамқорлық пен назарды қажет ететін жандардың өмір сапасын жақсартуға үлес қосып жүрген мамандарға алғыс білдіруге мүмкіндік берді.