Бұған дейін ауыл балалары Заря мектебіне қатынап оқыған еді, деп хабарлайды @Pavlodarnews.kz тілшісі. 

Жаңа мектеп барлық заманауи талаптарға сәйкес салынған. Кең әрі жарық кабинеттер, жаңа технологиялық құрал-жабдықтармен қамтылған сыныптар, спорт және акт залдары оқушылардың толыққанды білім алуына мүмкіндік береді. Мектеп 80 орынға лайықталып салынғанымен, қазірдің өзінде 85 оқушы білім алып жатыр.

Салтанатты жиынға қатысқан облыс әкімі Асайын Байханов мектептің ашылуы – ауыл өміріндегі үлкен серпіліс екенін атап өтті.

– Бұл мектеп – жастарымыздың болашағына салынған берік іргетас. Мұнда білім алған балалар ертең ел дамуына үлес қосатын азаматтар болып өседі деген сенімдеміз. Мықты ел – мықты мектептен басталады, – деді өңір басшысы.

Ол Бірлік ауылындағы жаңа мектеп – Мемлекет басшысы Қасым-Жомарт Тоқаевтың білім саласына ерекше назар аударуының нәтижесі екенін атап өтті. Бұл – ауылдағы балаларға сапалы білім алуға жасалған нақты қадам, елдің болашағына инвестиция.

– Білім ошағында 25 педагог, 20 техникалық қызметкер еңбек етеді. Осылайша ауылда 45 адам тұрақты жұмыспен қамтылып отыр. Мектептің ерекшелігі – ұстаздардың басым бөлігі – жас мамандар. Олардың арасында биыл оқуын тәмамдап, алғашқы еңбек жолын бастаған мұғалімдер де бар, – деді мектеп директоры Көлтай Калелханұлы.

Жаңа мектептің алғашқы түлектерінің бірі – Даяна Қобыландыда, өз қуанышымен бөлісіп, болашақтағы жоспарын айтты:

– Бұрын біз көрші ауылға барып оқитынбыз. Бұл әрине қиын болатын. Қазір ауылымызда жаңа мектеп ашылғанына қуаныштымын. Биыл 11-сыныпты аяқтап, алғашқы түлек атанатын болдым. Болашақта биология мен география пәндерін таңдап, жоғары білім алуды жоспарлап отырмын, – дейді ол.

Ашылу салтанатында ауыл ақсақалдары мен тұрғындары сөз сөйлеп, Мемлекет басшысының білім саласына айрықша көңіл бөліп отырғанын атап өтті.

– Осындай әсем де жайлы білім ордасының салынуы – Тәуелсіздігіміздің, халықтың бірлігінің арқасы. Бұл – жастардың жарқын болашағына жасалған қадам. Құрметті Асайын Қуандықұлына және құрылыс жұмыстарына атсалысқан барлық азаматтарға ауыл атынан алғысымызды білдіреміз, – деді ауыл ақсақалы.

Жаңа мектептің құрылыс жұмыстары небары төрт айдың ішінде аяқталған. Құрылысшылардың еңбегі ерекше атап өтілді. Жобаны жүзеге асыруға жергілікті кәсіпкерлер де үлес қосқан.

Мектеп жанында шағын орталық жұмыс істей бастады. Онда 20 бүлдіршін тәрбиеленуде. Бұрын ауылда тек бастауыш мектеп пен шағын орталық қана болған, кейін олар жабылып қалған еді. Енді ауылдың ең кішкентай бүлдіршіндерінен бастап, жоғары сынып оқушыларына дейін өз ауылында білім алу мүмкіндігі бар.