Азаматтарды дактилоскопиялық тіркеу еркін түрде жүргізіледі, деп хабарлайды @Pavlodarnews.kz.

1 қаңтардан бастап Қазақстан азаматтары мен тұрақты тұратын шетелдіктерді дактилоскопиялық тіркеу енгізілді. Бұл туралы Өңірлік коммуникациялар қызметінде өткен баспасөз конференциясында облыстық полиция департаменті басшысының бірінші орынбасары Жасқайрат Қайыров мәлім етті. 

– Жыл басынан бері жеке басын куәландыратын құжаттарды – паспорт, жеке куәлік беру кезінде Қазақстан Республикасының азаматтарын дактилоскопиялық тіркеу ерікті негізде жүргізіледі, – деді Жасқайрат Қайыров.

Оның сөзінше, 22 қаңтардағы жағдай бойынша 355 азамат саусақ ізімен құжат алды. «Дактилоскопиялық және геномдық тіркеу туралы» Заңға сәйкес 2024 жылғы 1 қаңтардан бастап Қазақстан Республикасында уақытша, тұрақты тұруға рұқсат немесе виза алу үшін жүгінген шетелдіктер мен азаматтығы жоқ адамдарды міндетті түрде саусақ іздері арқылы тіркеу көзделген. 

– Шетелдіктердің немесе азаматтығы жоқ адамдардың міндетті дактилоскопиялық тіркеуден өтуден бас тартуы ҚР ӘҚБтК 443-бабына сәйкес Қазақстан Республикасынан әкімшілік шығарып жіберуге әкеп соғады. Бүгінде 782 шетелдік осы рәсімнен өтті, – деді Жасқайрат Қайыров.

Осы рәсімнен өту үшін уақытша болу орны бойынша көші-қон қызметі бөліміне жүгіну қажет.