Облыстағы мемлекеттік қызметшілердің саны – 4000-нан астам, деп хабарлайды @Pavlodarnews.kz тілшісі.

– Өңірдегі мемлекеттік қызметкерлердің орташа жасы – 42. Ал орташа еңбек өтілімі – 12 жыл. Орташа есеппен мемлекеттік қызметкерлердің жалақысы 260 мың теңгені құрайды. Өңірдегі мемлекеттік қызметкерлердің 68 пайызы – әйел адамдар, 32 пайызы – ер адамдар, – дейді ҚР Мемлекеттік қызмет істері агенттігінің Павлодар облысы бойынша департаментінің басшысы Ержан Қарымсақов.

Департамент басшысы мемлекеттік қызметкер жұмыстан тыс уақытта да  әдеп сақтауы тиіс екенін атап өтті. Соңғы екі жылда біршама талапбұзушылық орын алған. 

Қазақстан Республикасы Мемлекеттік қызмет істері агенттігі өз құзыреті шегінде мемлекеттік қызметке қатысты бұқаралық ақпарат құралдарында және әлеуметтік желілердегі сыни сипаттағы мақалаларға қатысты күн сайынғы мониторинг жүргізіледі. Мұндай оқиға орын алған жағдайда, тиісті мемлекеттік органдарға шара қабылдау үшін хат жолданады.

– 2022 жылдың нәтижелері бойынша мемлекеттік қызметке қатысты 37 сыни мақала анықталып, 21 қызметші тәртіптік жауапкершілікке тартылды. Ал ағымдағы жылда 17 сыни мақала анықталып, 4 мемлекеттік қызметшіге қатысты тәртіптік сипаттағы шаралар қолданылды, – дейді Ержан Қарымсақов.