Бұл шараның мақсаты – қоғамдық тәртіпті сақтау және қылмыстардың алдын алу, деп хабарлайды @Pavlodarnews.kz тілшісі.

Облыстық полиция департаменті баспасөз қызметінің мәліметінше, өңірде 10-12 маусым аралығында республикалық «Құқықтық тәртіп» жедел-профилактикалық іс-шарасы өтуде. Бұл шара қоғамдық тәртіпті сақтау, көшелерде және басқа да қоғамдық орындарда қылмыстардың алдын алу мен жолын кесу мақсатында жүргізілуде.

– Іс-шара барысында полиция ішкі істер органдарында есепте тұрған адамдарды тексереді. Сонымен қатар, тыйым салынған заттарды заңсыз сақтайтын немесе тасымалдайтын адамдарды анықтау бойынша жұмыстар жүргізіледі. Ұсақ құқық бұзушылықтарға «нөлдік төзімділік» қағидатын қамтамасыз етуге баса назар аударылып, жол қозғалысын қадағалау күшейтіледі, оның ішінде қала сыртындағы жолдарда да, – делінген хабарламада.

Тексерулер саяжайларда, демалыс аймақтарында, құрылыс объектілерінде, базарларда, техникалық қызмет көрсету станцияларында, шаруа және фермер қожалықтарында, қыстақтарда және басқа да шалғай жерлерде жүргізіледі. Бұл тексерулердің мақсаты – азаматтардың еңбегін заңсыз пайдалану және қаруды заңсыз сақтау фактілерін анықтау.

Полицейлер облыс тұрғындары мен қонақтарынан аталған алдын алу шараларына түсіністікпен қарауды сұрайды. Тұрғындар қандай да бір құқық бұзушылықтың куәгері болған жағдайда, дереу «102» телефонына хабарласу немесе «police 102» мобильді қосымшасын пайдалану қажет.