1 наурыздан бастап Дүниежүзілік азаматтық қорғау күні басталды, деп хабарлайды @Pavlodarnews.kz тілшісі

Павлодар облысы Төтенше жағдайлар департаментінің азаматтық қорғаныс басқармасы бастығының орынбасары Ерлан Қасымовтың айтуынша, биыл бұл мереке «Тұрақты және қауіпсіз болашақ үшін экологиялық тәуекелдерді басқару» ұранымен өтуде.

Облыс әкімі бекіткен 38 тармақтан тұратын іс-шаралар жоспары мемлекеттік органдар, білім басқармасы, полиция, волонтерлер және басқа да мүдделі тараптардың қатысуымен жүзеге асырылуда.

– Қазіргі таңда облыс аумағында су тасқынына қарсы іс-шаралар жүргізілуде. Бұл шаралар екі кезеңде өтеді: біріншісі – қар еріген табиғи кезеңде, екіншісі – гидротехникалық құрылыстардан су төгу кезінде. Су тасқыны тікелей экологиялық тәуекелдермен байланысты, себебі барлық ағындар су қоймаларына түсіп, судың ластануы мен экологиялық салдарға әкелуі мүмкін, – деді Ерлан Қасымов. 

Сонымен қатар, департамент қысқы кезеңде су айдындарының қауіпсіздігін қамтамасыз ету бойынша жұмыстар жүргізуде. Маусым басынан бері Екібастұз өңірінде автокөліктердің мұз астына батуымен үш жағдай тіркелді. Барлық көлік иелері әкімшілік жауапкершілікке тартылды. Мұндай оқиғалар адамдар үшін ғана емес, экология үшін де қауіпті: жанар-жағармай материалдары мен майлар суға түсіп, оны тұрмыстық және ішетін су үшін пайдалануымызға кері әсерін тигізеді.

Су тасқыны кезеңіне дайындық аясында жергілікті атқарушы органдар кешенді шаралар өткізді. Облыс әкімі жетекшілігімен төтенше жағдайлар комиссиясының үш отырысы және бір жұмыстық кеңес өтті. Нәтижесінде екі миллионнан астам текше метр қар шығарылып, 63 мыңнан астам қап дайындалды, 1281 су өткізгіш құбыр тазартылды, өзендер мен су қоймалары тексерілді.

– Жақында Ақтоғай ауданында Сілеті өзенінде мұз жару жұмыстары жүргізілді. Жұмыс үш учаскеде жүріп, жалпы аумағы шамамен 1000 шаршы метрді құрады. Мұз қабатын әлсірету үшін 126 кг жарылғыш зат қолданылды. Бұл – мәжбүрлі шара болып табылады. Негізгі мақсат – мұз кептелістерін болдырмау, елді мекендердің су астында қалмауын қамтамасыз ету және ауыр экологиялық салдардың алдын алу, – деді басқармасы бастығының орынбасары.

Экологиялық қауіптерге байланысты: жарылыс шу мен соққы толқынымен минималды әсер етуі мүмкін, бірақ қазіргі уақытта судың немесе топырақтың ластануы тіркелген жоқ, балық қырылуы байқалмаған, ал алдыңғы жылдардың талдауына сәйкес, аздаған ауытқулар рұқсат етілген нормадан аспайды.

Ерлан Қасымов облыс тұрғындарына жылы ауа райының әсерінен Ертіс өзеніндегі мұз құрылымы өзгеріп жатқанын ескертіп, мұз қалың болса да, қопсыңқы және қауіпті екенін еске салды. Әсіресе балықшыларға мұзға шықпауға ескерту жасалды. Себебі бұл өмірге қауіпті және қайғылы жағдайларға әкелуі мүмкін.