Полицейлер жол қозғалысына қатысушыларды жол жүру ережелерін қатаң сақтап, жолда абай болуға шақырады, деп хабарлайды @Pavlodarnews.kz тілшісі.

Облыстық полиция департаменті мәліметінше, өңір жолдарында 700-ден астам жол-көлік оқиғасы тіркеліп, 42 адам қаза тауып, 998 адам жарақат алған.

– Тек демалыс күндері үш оқиға тіркелді. Мысалы, «Железин – Михайловка» автожолында Mernodi 200 маркалы мотоциклдің жүргізушісі рөлге ие бола алмай, жол жиегіне шығып кеткен. Салдарынан жолаушы зардап шекті. «Атамекен – Ертіс – Русская Поляна» автожолында Ақтоғай ауылы маңында Chevrolet Cobalt автокөлігінің жүргізушісі мас күйінде қарама-қарсы бағыттағы жаяу жүргіншіні қағып кеткен. «Павлодар – Семей» автожолында Қарқала ауылы маңында Chevrolet Cruze автокөлігінің жүргізушісі екі жылқыны соққан, – делінген хабарламада.

Жол апаттарының салдарынан төрт жолаушы ауруханаға жеткізілді.

Еске сала кетейік, Павлодар мен Ертіс арасындағы тас жолда автокөлік аударылып, екі адам қаза тапты, ал тағы үш адам Павлодар қалалық №1 ауруханасына жеткізілді. Бұл соңғы төрт тәулікте өңірде болған 15 жол-көлік оқиғаларының бірі.