Барлық макрокөрсеткіштер оң нәтижеде, деп хабарлайды @Pavlodarnews.kz тілшісі.

Асайын Байхановпен өткен кеңейтілген аппараттық жиында облыстық экономика және бюджеттік жоспарлау басқармасының басшысы Ирина Назарчук өңір барлық бағыттар бойынша тұрақты түрде оң динамика көрсетуде екенін атап өтті.

Оның айтуынша, қысқа мерзімді экономикалық индикатор 105 пайызды құрады, ал республикалық көрсеткіш – 109 пайыз.

– Өнеркәсіптік өнім көлемі 1,8 триллион теңгені құрады, өңдеу секторында 3,4 пайызға, су шаруашылығында 10 пайызға өсім бар. Өңір экономикасына 440 миллиард теңгеден астам инвестиция тартылды, – деді басқарма басшысы. 

Облыста 164 мың шаршы метрден астам тұрғын үй пайдалануға берілді, құрылыс жұмыстарының көлемі 137 миллиард теңгені құрады. Бұл өткен жылдың көрсеткішінен 13 пайызға жоғары.

Ирина Назарчук ішкі сауда көлемі 22 пайызға, көлік саласындағы қызметтер көлемі 15,4 пайызға, байланыс саласында 13 пайызға артқанын атап өтті.

– Барлық көрсеткіштер бойынша оң динамиканы Павлодар, Екібастұз қалалары, сондай-ақ Ақтоғай, Баянауыл, Май және Шарбақты аудандары қамтамасыз етті. Аксу және тағы үш ауданда бес оң көрсеткіш бар. Ауыл шаруашылығы, өнеркәсіп, тұрғын үйді пайдалануға беру және бөлшек сауда салаларында төмендеу тіркелді, – деп нақтылады баяндамашы.

Тек екі көрсеткіштен оң нәтиже Ертіс және Аққулы аудандарында байқалды.

– Жалпы өңір барлық салалар бойынша тұрақты оң динамика көрсетіп отыр, бірақ әлі де атқаратын жұмыс көп. Бұл қарқынды төмендетуге болмайды. Жартыжылдықтың нәтижелері жалпы оң, бірақ алда бірлескен әрі қарқынды жұмысты талап ететін алты ай бар, – деді облыс әкімі Асайн Байханов. 

Аймақ басшысы бұл жетістіктер мемлекеттік органдардың үйлесімді жұмысының, жаңа нысандардың ашылуының және шағын және орта бизнес саласындағы инвестициялық жобалардың жүзеге асырылуының нәтижесі екенін атап өтті.