Кезекші вахтер мен күзетші жұмыстан шеттетілді, ал заңсыз кірген жас жігітке әкімшілік айыппұл салынды, деп хабарлайды @Pavlodarnews.kz тілшісі.

Торайғыров университетінің басшылығы 23 қазанға қараған түні жатақханада болған оқиғаға қатысты ресми түсініктеме берді. Әлеуметтік желілерде тараған «студенттің балконнан секіріп кетуі» туралы ақпарат шындыққа жанаспайды.

ЖОО басшылығы растағандай, аталған түнде жатақханаға университеттің студенті болып саналмайтын және кампуста тұрмайтын бөгде жас жігіт кірген. Ол өзін жатақхана тұрғынымен сөйлесуге келдім деп, күзет бекетінен жалған рұқсатнама көрсету арқылы өткен.

Бұдан кейін жігіт шын мәнінде болмаған қылмыс туралы хабарлаған. Оқиға орнына полиция қызметкерлері жетіп, тексеру жүргізді. Тексеру қорытындысы бойынша, шақыру жалған болып шыққан.

– Балконнан секіріп құтылмақ болған студент туралы ақпарат шындыққа сәйкес келмейді. Оқиғадан ешқандай зардап шеккендер мен құрбандар жоқ, университет инфрақұрылымына шығын келмеді, – делінген хабарламада.

Оқиғаға байланысты бірқатар қатаң шаралар қабылданды. 

– Жатақханаға заңсыз кірген жас жігітке әкімшілік айыппұл салынды. Жатақхана ережелерін бұзған инциденттің бес қатысушысын шығару туралы шешім қабылданды. Оқиға кезінде кезекшілік еткен жатақхананың вахтері мен күзет қызметкері жұмыстан шеттетілді, – деді университеттің баспасөз қызметі.

Сондай-ақ, түнгі сағат бір шамасында жедел жәрдем студенттік жатақханаға 2-курс студентінде болған құрысу ұстамасына байланысты шақырылғаны, және бұл оқиғаның бөгде адамның кіруіне еш қатысы жоқ екені атап өтілді.