Тұрғын үй комиссиясы мүгедектігі бар екі баласы бар қызметкерге қосымша шаршы метрлер үшін төлем төлеуден бас тартқан, деп хабарлайды @Pavlodarnews.kz тілшісі.

Облыстық мамандандырылған ауданаралық әкімшілік сотының мәліметінше, ішкі істер органдарында 25 жылдан астам еңбек өтілі бар қызметкер Полиция департаменті тұрғын үй комиссиясының шешіміне шағымданған. Талап қоюшы – мүгедектігі бар екі баланы тәрбиелеп отырған төрт адамнан тұратын отбасы отағасы.

2026 жылдың ақпанында ол әр балаға 18 шаршы метрден есептелетін қосымша 36 шаршы метрді ескере отырып, төлем мөлшерін қайта қарауды және бұрынғы сомаларды қайта есептеуді сұраған. Алайда комиссия заңнамада мұндай тікелей норма жоқ деген сылтаумен өтінішті қанағаттандырмаған.

Істі қарау барысында сот «Тұрғын үй қатынастары туралы» Заңға сәйкес мүгедектігі бар балалары бар отбасыларға жеке қосымша бөлме берілетінін және ол артық алаң болып есептелмейтінін нақтылады. Сондай-ақ заңда мұндай алаң үшін төлем жасауға тікелей тыйым салынбаған.

Барлық күмәндарды азаматтың пайдасына түсіндіру қағидатын басшылыққа алған сот комиссия шешімінің күшін жойды. Енді Полиция департаменті 2026 жылдың наурыз айынан бастап қосымша 36 шаршы метрді ескере отырып ай сайынғы төлемдерді төлеуге және 2023 жылдың ақпанынан 2026 жылдың ақпанына дейінгі аралық үшін қайта есептеу жүргізуге міндеттелді.

Сот шешімі заңды күшіне енді.