№ 21 мектепте «Оқу-тәрбие үдерісінде ұлттық бірегейлік» тақырыбында семинар-практикум өтті, деп хабарлайды @Pavlodarnews.kz тілшісі.

Оған қала мектептерінің тәрбие ісі жөніндегі мектеп директорларының  орынбасарлары қатысты.

Семинардың мақсаты – оқу-тәрбие үдерісінде патриоттық және адамгершілік тәрбие беру, ұлттық мәдениетке, әдет-ғұрыптар мен дәстүрлерге құрметпен қарауға бағытталған тәжірибе алмасу.

–   Семинар барысында қатысушылар интерактивті алаңдар форматында тиімді әдістер мен тәсілдерді талқылады. Мектеп мұғалімдері мен кітапханашылары өз тәжірибелерімен бөлісті, – деді қалалық білім беру бөлімінде.

Қатысушылар қазақ тілінен «Ел намысын қорғаған Бақтияр Артаев» тақырыбындағы ашық сабаққа қатысты. «Классик немесе Мұхтар Мағауиннің мәңгілік күйі» атты әдеби қонақжайда кітапхана қорын пайдалану тәжірибесімен танысты. «Бірлік – күш, ынтымақ – береке» атты спорттық квест-ойында асық ату, бес асық, бәйге, арқан тарту сияқты ұлттық ойындардың тарихы мен дәстүрлері интерактивті түрде ұсынылды.

Сонымен қатар, «Ұлттық бірегейлікті зерттеудегі заманауи технологиялар» атты шеберлік сағаты мен воркшоп барысында мұғалімдер тәжірибелік әдіс-тәсілдерді меңгеріп, әдістемелік материалдар әзірлеу бойынша білімдерін жетілдірді. Сонымен қатар, қатысушылар «Әжелер» клубының «Әжелер даналық мектебі», «Бабалар дәстүрі – ұрпаққа өсиет» тақырыптарындағы отырыстарына қатысып, клуб жұмысы туралы мағлұмат алды.

Семинар қорытындысы бойынша қатысушылар рефлексия өткізіп, өзекті мәселелерді талқылады, тәжірибелік материалдармен алмасып, оларды оқу-тәрбие үдерісінде қолдану жолдарын қарастырды.