Павлодар облысында биыл табиғатты қорғау мақсатында 120 миллион текше метр су Шідерті өзенінің жайылмасына жіберілді, деп хабарлайды @Pavlodarnews.kz тілшісі.

ҚР Су ресурстары және ирригация министрлігінің «ҚазСуШар» РМК Павлодар филиалы пайдалану бөлімінің бастығының міндетін атқарушы Серік Мұстафиннің айтуынша, табиғат қорғау мақсатындағы су жіберілімі 7 сәуір мен 5 маусым аралығында жүргізілді. Су Қаныш Сәтбаев атындағы канал арқылы Шідерті магистральдық каналы мен Шідерті су жеткізу трактісі арқылы жалпы аумағы 21 036 гектар болатын лимандық алқапқа жеткізілді. Нәтижесінде 21 мың гектар жер суға толтырылып, өңірдегі экологиялық тепе-теңдікті сақтауға және мал азығы қорын толықтыруға мүмкіндік туды.

– Бұл жұмыстар Шідерті өзенінің табиғи ағысын реттеуге, Әулиекөл көлдер жүйесі мен Бәсентин, Шығанақ, Бозайғыр және Жалаулы көлдерінің су деңгейін сақтауға ықпал етеді. Сонымен қатар өңірдің экологиялық жағдайын жақсартып, су құстарының мекендеу ортасын сақтауға мүмкіндік береді, – деді Серік Мұстафин.

Маманның айтуынша, табиғатты қорғау мақсатындағы су жіберілімдері Екібастұз қаласының ауылдық аймағындағы алты ауылдық округ пен Ақтоғай ауданындағы 450-ге жуық ауыл шаруашылығы тауарын өндірушіні табиғи шабындықтар арқылы ірі мал азығымен қамтамасыз етуге де оң әсерін тигізеді.

Серік Мұстафиннің сөзінше, қазіргі таңда филиал пайдаланатын су шаруашылығы нысандары штаттық режимде жұмыс істеп тұр. 

Еске сала кетейік, ҚР Су ресурстары және ирригация министрлігінің «ҚазСуШар» РМК «Қаныш Сәтбаев атындағы арна» филиалының Павлодар пайдалану басқармасы 2026 жылы Ерте болжаудың биллингтік жүйесі арқылы шарт жасасқан 40 ауыл шаруашылығы тауарын өндірушіні суармалы сумен қамтамасыз етуде.