Кардиоорталықтың дәрігерлері жүрек-қантамыр патологиясы мен онкологиялық ауруы бар пациенттің өмірін сақтап қалды, деп хабарлайды @Pavlodarnews.kz тілшісі.

ҚР Денсаулық сақтау министрлігінің мәліметінше, 67 жастағы пациент биыл ақпанда «Жүректің ишемиялық ауруы, ФК III кернеу стенокардиясы» диагнозымен ауруханаға жатқызылған. Алайда операция алдындағы тексеру кезінде одан сол жақ бүйректің қатерлі ісігі анықталды. Бұл дәрігерлерден маңызды шешім қабылдауды талап етті, себебі екі бөлек операция жасау пациенттің өміріне қауіп төндіретін еді.

Мамандар екі хирургиялық араласудың да жоғары қауіпке ие екенін айтты. Егер алдымен бүйректі алып тастаса, жүрекке түскен жүктеменің салдарынан инфаркт қаупі жоғарылайтын еді. Ал жүрекке жасалған операция қатерлі ісік жасушаларының қанайналым жүйесі арқылы таралуына әкелуі мүмкін.

Барлық факторларды ескере отырып, дәрігерлер бір мезгілде екі операция жасау – симуляциялық араласу әдісін қолдану туралы шешім қабылдады. Ота барысында алдымен нефрэктомия (бүйректі алып тастау), содан кейін жүректі шунттау жасалды. Операцияға кардиохирургтар, онкологтар, анестезиологтар, трансфузиологтар және операциялық мейіргерлер командасы қатысты.

Күрделі медициналық араласу сәтті өтіп, пациент оңалу кезеңінен кейін жақсаруымен ауруханадан шығарылды.

Дәрігерлердің айтуынша, осындай аралас операциялар оңалту кезеңін қысқартып, шұғыл кардиохирургиялық емдеуді қажет ететін онкопатологиясы бар пациенттерге уақтылы көмек көрсетуге мүмкіндік береді.