Кәсіпкерлерден жерді заңсыз алып қоюдың жолы кесілді, деп хабарлайды @Pavlodarnews.kz.

Облыстық прокуратураның баспасөз қызметінің хабарлауынша, Павлодар қаласының әкімдігі кеме жөндеу зауыты жұмыс істейтін жер учаскесін мектеп салу үшін белгілеген болатын. Биылғы жылдың қыркүйегінде облыс орталығының бас жоспарына қайшы келетін егжей-тегжейлі жоспарының жобасы заңсыз бекітілген. Бір айдан кейін екі шаруашылық жүргізуші субъектіден жерді мәжбүрлеп иеліктен шығаруды бастау туралы қаулы шығарылған.

– Мұндай шешім бизнестің болуын тоқтатады, жер және су заңнамасының талаптарына қайшы келеді және ең бастысы, оқушылардың өміріне қауіп төндіреді. Ерекше қорғалатын табиғи аумаққа жататын «Ертіс» өзенінің жағалауына мектеп салуға жол берілмейді,– делінген хабарламада.

Павлодар облысы прокурорының араласуынан кейін жергілікті атқарушы органның заңсыз актілері қадағалау актісі бойынша күшін жойды. Жаңа мектеп салу үшін басқа түрлері қарастырылатын болады.