Бұл шаралар алдағы жылыту маусымында электр жабдықтарының сенімді жұмысын қамтамасыз етуге бағытталған, деп хабарлайды @Pavlodarnews.kz тілшісі.

«Павлодар Электржелістік Тарату Компаниясы» АҚ (ПЭТК) Шығыс электр желілері кәсіпорны қосалқы станциялар қызметінің жұмыскерлері қазіргі уақытта «Өнеркәсіптік» қосалқы станциясындағы №1 трансформаторға ағымдағы жөндеу жұмыстарын жүргізуде. Бұл жұмыстар алдағы жылыту маусымы қарсаңында электр жабдықтарының сенімді және тұрақты жұмыс істеуін қамтамасыз ету үшін өте маңызды.

– Бүгін біз автотрансформаторды және оның оқшаулауын тазартып, кедергісін өлшеп, байланыс жүйесін тарттық. Бұл жұмыстардың барлығы жылыту маусымы қарсаңында электр жабдықтарының сенімді және тұрақты жұмыс істеуі үшін қажет, – дейді «ПЭТК» АҚ Шығыс электр желілері кәсіпорны қосалқы станциялары қызметінің бастығы Нұрлыбек Рымтаев. 

«Өнеркәсіптік» қосалқы станциясы – өңірдің энергетикалық жүйесіндегі негізгі нысандардың бірі. Мұнда түрлі энергия беруші компаниялардан 220 кВ электр энергиясы жеткізіледі. Станцияда бұл қуат 110 кВ кернеуге түрлендіріліп, өнеркәсіптік кәсіпорындар мен тұрғын аудандарды сенімді қуатпен қамтамасыз ету үшін әрі қарай желілерге таратылады.

Мұндай қосалқы станциялардағы ағымдағы жөндеу жұмыстары күзгі-қысқы кезеңге дайындықтың маңызды бөлігі болып табылады. Жабдықты уақытылы жөндеу және диагностикалау арқасында энергия жүйесінің тұрақты жұмысы және Павлодар өңірі тұрғындарын үздіксіз электрмен жабдықтау қамтамасыз етіледі.