Қазіргі уақытта жедел уәкілдер ұсталған ер адамның өзге де қылмыстарға қатыстылығын тексеруде, деп хабарлайды @Pavlodarnews.kz.

Облыстық полиция департаментінің есірткі қылмыстарына қарсы іс-қимыл басқармасы қызметкерлері жедел-іздестіру іс-шараларын жүргізу барысында Павлодарда синтетикалық топтағы есірткіні сақтауға күдікті 21 жастағы ер адамды ұстады. Анықталғандай, ол бірқатар көлеңкелі интернет-дүкенде көтерме «қоймашы» болған. 

Жүргізілген тінту шаралары кезінде күдіктіден 200 грамнан астам мефедрон есірткі заты бар түйіншектер табылып, тәркіленді.

– Есірткі құралдарын, психотроптық заттарды және олардың аналогтарын аса ірі мөлшерде заңсыз дайындау, өңдеу, сатып алу, сақтау, тасымалдау фактісі бойынша қылмыстық іс қозғалды, – деп хабарлады облыстық полиция департаменті бастығының орынбасары Болат Нұрсейітов.

Күдіктіге қатысты бұлтартпау шарасы ретінде қамауға алу түрі таңдалды.