Кардиоорталықта жүрек УДЗ, ЭКГ және балалар кардиологының консультациясы тегін ұсынылады, деп хабарлайды @Pavlodarnews.kz тілшісі.

Облыстық кардиология орталығында Балаларды қорғау күніне арналған айлық аясында Ашық есік күні ұйымдастырылады. Іс-шара 2018–2019 жылдары туған, биылғы оқу жылында мектеп табалдырығын аттайтын балаларға арналған.

– Ата-аналар мен олардың балалары үшін жүрек қызметін тексеруге мүмкіндік беріледі. Бүлдіршіндер жүректің ультрадыбыстық зерттеуінен өтіп, жүрек-қантамыр жүйесінің жағдайын бағалау мақсатында электрокардиография  жасатады. Сондай-ақ балалар кардиологы әр балаға жеке кеңес береді. Бұл тексерулер жүрек-қантамыр жүйесіндегі мүмкін болатын ауытқуларды ерте анықтауға және қажетті жағдайда емдеу мен бақылау жоспарын құруға көмектеседі, – деді орталықтың баспасөз қызметі. 

Шара 4 маусым күні сағат 8:00-ден 12:00-ге дейін Ткачев көшесі, 10/3 мекенжайында өтеді. Қабылдауға жазылу сол күні, тікелей іс-шара барысында жүргізіледі.

Ұйымдастырушылардың айтуынша, Ашық есік күні тек 6–7 жас аралығындағы және 2025–2026 оқу жылында бірінші сыныпқа баратын балалар үшін өткізіледі. Жас ерекшелігіне сай келмейтін балалар іс-шараға қабылданбайды.